शिरपूर (वृत्तसंस्था) तालुक्यातील गिधाडे पुलावरून मुलाला ढकलून दिल्यानंतर महिलेनेही नदीत उडी घेऊन आत्महत्या धक्कादायक केल्याची घटना घडली. सायंकाळी महिलेचा मृतदेह बाहेर काढण्यात मच्छीमारांना यश आले. मुलाचा मृतदेह मात्र उशिरापर्यंत हाती लागला नव्हता.
मृत महिलेचे नाव योगिता रवींद्रसिंह गिरासे (वय ३०) आहे. ती वाडी (ता.शिरपूर) येथील रहिवासी आहे. तिचा पती सुरत येथे कामाला होता. त्याने नुकतीच वाडी येथे शेती घेतली असून तो गावीच स्थायिक होण्याच्या प्रयत्नात आहे. दीड महिन्यांपासून योगिता डोंगरगाव (ता.शहादा) येथे माहेरी होती. तिच्या माहेरच्या लोकांनी बसमध्ये बसवून देत शिरपूरकडे रवाना केले. तिचा पती सुरतला कामानिमित्त गेला असून त्याने वडिलांना वाघाडी (ता.शिरपूर) येथे पत्नीला बसमधून उतरवून घेण्यास सांगितले. त्याप्रमाणे ते वाघाडीला वाट बघत थांबले. मात्र ती वाघाडीला पोहचलीच नाही.
दरम्यान दुपारी शिरपूर-शिंदखेडा रस्त्यावर गिधाडे (ता.शिरपूर) येथील पुलावरून मुलाला ढकलून दिल्यानंतर महिलेनेही नदीत उडी टाकल्याचे दृश्य काहींनी पाहिले. काही मिनिटातच तेथे जमाव जमला. पुलावर एक बॅग पडली होती. तिच्यात एका वहीमध्ये तेजस रवींद्रसिंह गिरासे असे नाव लिहिले असून मोबाईल नंबरही दिला होता. त्यावरुन संपर्क साधल्यावर तिची ओळख पटली. योगिताने मोठा मुलगा तेजस (वय १० वर्ष) याला ढकलून स्वतः:ही आत्महत्या केल्याचे निष्पन्न झाले. परिसरातील मच्छीमारांनी मृतदेह शोधण्यास सुरवात केली. सायंकाळी योगिताचा मृतदेह शोधण्यात यश आले.
