नागपूर (वृत्तसंस्था) शनिवारी कळमना पोलीस ठाण्यांतर्गत एका अनधिकृत पार्टीवर पोलिसांनी छापा टाकला होता. क्रिकेट बुकी आशिष कुकडे उर्फ बोमा याने आयोजित केलेल्या या पार्टीत पोलिसांनी एक कोटींच्या मालासह २८ जणांना ताब्यात घेतले होते. मात्र पोलिसांच्या या कारवाईनंतर अवघ्या २४ तासांनंतर ग्रामीण भागात पुन्हा पार्टी देऊन बुकीने पोलिसांना एकप्रकारे आव्हान दिल्याचे चित्र आहे.
शहरातील बर्थ डे पार्टीवर शनिवारी पोलिसांनी धाड टाकल्यानंतर क्रिकेट बुकी बोमाने रविवारी रात्री ग्रामीण भागातील एका बड्या हॉटेलमध्ये पार्टीचे आयोजन करून जल्लोषात बर्थ डे साजरा करत यंत्रणेला एकप्रकारे आव्हान दिले. धाडी टाकल्याच्या २४ तासांनंतर नागपूर ग्रामीण पोलिसांच्या हद्दीतील हॉटेलमध्ये बोमाने वाढदिवसाची भव्य पार्टी आयोजित केली होती. या पार्टीला शहरातील श्रीमंत व्यक्ती आणि सहकारी बुकींनी हजेरी लावली होती. पार्टीची माहिती मिळताच ३० ते ३५ पोलीस अधिकाऱ्यांनी हॉटेल गाठले, पण कोणतीही कारवाई केली नाही. त्यामुळे अधिकाऱ्यांच्या कार्यप्रणालीवर प्रश्नचिन्ह निर्माण झाले आहे.
कळमना पोलीस ठाण्यांतर्गत चिखली चौकाजवळ रिवाज लॉन येथे शनिवार, २२ जुलै रोजी मध्यरात्री क्रिकेट बुकी आशिष कुबडे उर्फ बोमा (रा. इतवारी, नागपूर) याने त्याच्या वाढदिवसानिमित्त जंगी पार्टी आयोजित केली होती. या पार्टीत शहरातील नामांकित क्रिकेट बुकींना बोलाविण्यात आले होते. या पार्टीत हुक्का, दारू आणि जुगार खेळण्याची व्यवस्था केली होती. रात्री उशिरा पोलीस उपायुक्त (गुन्हे) मुमक्का सुदर्शन व परिमंडळ क्रमांक ५ चे पोलीस उपायुक्त श्रावण दत्त यांना माहिती मिळताच त्यांनी लॉनवर धाड टाकली आणि २८ बुकींना ताब्यात घेतल्यानंतर कागदोपत्री कारवाई करून त्यांची मुक्तता केली.
या कारवाईनंतर बोमाने शनिवारची बर्थ डे पार्टी रद्द केली, पण त्यानंतर बोमाने छिंदवाडा रोडवरील एका भव्यदिव्य हॉटेलमध्ये रविवारी रात्री बर्थ डे पार्टीची योजना आखली. यासाठी खास निमंत्रित पाहुण्यांना बोलाविण्यात आले. यासाठी मुंबई आणि कोलकाता येथून अनेक पाहुणे आले. शहरातील प्रमुख व्यक्तींचीही या पार्टीला उपस्थिती होती. या पार्टीतील काही फोटो व्हायरल झाले. यात काही तरुणी अर्धनग्नावस्थेत नाचताना दिसल्या. त्यांना बाहेरून आणण्यात आल्याची माहिती समोर आली आहे.
शनिवारच्या धाडीनंतर बोमाने संडे पार्टीसाठी उत्पादन शुल्क विभागाकडून एक दिवसाचा मद्यविक्रीचा परवाना घेऊन सावधगिरीची पावले उचलली. त्यामुळे कार्यक्रमात सर्वजण दारू पिऊन नाचगाण्यात धुंद असल्याचे चित्र होते. कळमना येथील रिवाज लॉन येथील धाडीच्या कारवाईनंतर बोमाने नव्या जोमाने २४ तासांच्या आत पुन्हा बर्थ डे पार्टी आयोजित केल्याने त्याच्या धाडसाची चर्चा सुरू आहे. कधीकाळी दोन वेळच्या जेवणाची सोय नसलेला बोमा आज अब्जावधीमध्ये खेळत आहे.
नागपूर ग्रामीण पोलिसांना या पार्टीची सूचना मिळताच ३० ते ३५ पोलिसांचा ताफा घटनास्थळी दाखल झाला. पोलिसांनी त्वरेने पार्टीचे व्हिडीओ रेकॉर्ड करण्यास सुरुवात केली. हा प्रकार लक्षात येताच परदेशी अर्धनग्नावस्थेत नृत्य करणाऱ्या तरुणी थांबल्या, पण कोणीतरी पोलीस अधिकाऱ्यांशी चर्चा केली आणि आल्या पावली पोलीस ताफा परत गेला, पण अधिकृतरीत्या याची पुष्टी झालेली नाही. रविवारच्या पार्टीत ५० लाखांहून अधिक खर्च झाल्याची चर्चा आहे. याबाबतचे वृत्त आज विविध माध्यमांनी दिली आहे.
