ठाणे (वृत्तसंस्था) प्रॉपर्टीच्या वादातून सासऱ्याने आधी सुनेच्या डोक्यात वार केले, आणि मग घर पटवून स्वतः गळफास घेत आत्महत्या केल्याची धक्कादायक घटना बदलापुरात घडली आहे. या घटनेने संपूर्ण बदलापुरात एकच खळबळ उडाली आहे.
मिळालेल्या प्राथमिक माहितीनुसार, बदलापूर पश्चिमेच्या शनिनगर परिसरातील हेरंब सृष्टी अपार्टमेंटमध्ये किसन जाधव हे मुलगा, सून, नात आणि नातू यांच्यासह वास्तव्याला आहेत. बुधवारी (१३ ऑक्टोबर) दुपारच्या सुमारास जाधव यांचा मुलगा कामावर गेला होता, तर मुलाची दोन्ही मुलं बाहेर गेली होती. यावेळी किसन जाधव आणि त्यांची सून असे दोघेच घरात असताना या दोघांमध्ये अज्ञात कारणावरून वाद झाले. या वादात जाधव यांनी सुनेच्या डोक्यात धारदार शस्त्राने वार केले. यानंतर सुनेनं आरडाओरडा केल्यानं शेजाऱ्यांनी तिथे धाव घेतली आणि सुनेला रुग्णालयात नेलं. या घटनेनंतर किसन जाधव यांनी घराच्या मुख्य प्रवेशद्वाराला आतून कपाट लावलं आणि संपूर्ण घर पेटवून दिलं. यानंतर स्वतः नायलॉनच्या दोरीने गळफास घेत आत्महत्या करण्याचा प्रयत्न केला. जाधव यांच्या घरातून धूर निघू लागल्यानंतर शेजाऱ्यांनी अग्निशमन दलाला पाचारण केलं. अग्निशमन दलानं जाधव यांच्या घराचा दरवाजा तोडून आत प्रवेश केला असता संपूर्ण घर जळून खाक झालं होतं, तर जाधव हे अर्धमेल्या अवस्थेत आढळून आले. अग्निशमन दलाच्या जवानांनी जाधव यांना तातडीने इमारतीखाली आणलं असता इमारतीच्या दारातच त्यांचा मृत्यू झाला.
दरम्यान, जाधव यांच्या जखमी सुनेवर बदलापूरच्या खासगी रुग्णालयात उपचार सुरू आहेत. त्यांची प्रकृती धोक्याबाहेर आहे. या घटनेमुळे बदलापूर शहरात मात्र मोठी खळबळ उडाली आहे.
