मुंबई (वृत्तसंस्था) नवी मुंबईत घडलेल्या एका घटनेने पोलीस देखील चक्रावले आहेत. कारण एका अल्पवयीन मुलीने स्वतःच्या आईचा खून करून आईने आत्महत्या केल्याचा बनाव रचला. मात्र पोलिसांच्या चौकशीतून सर्व घटना समोर आली आहे. १५ वर्षीय मुलीने कराटे बेल्टने गळा आवळून आईची निर्घृण हत्या केल्याची धक्कादायक घटना ३० जुलै रोजी ऐरोलीत घडली.
पोलीस अधिकाऱ्याने दिलेल्या माहितीनुसार, मुलीने नीट परीक्षेसाठी तयारी करावी यासाठी महिला तिच्या मागे लागली होती. मुलीने डॉक्टर व्हावं अशी त्यांची इच्छा होती. ३० जुलैला परीक्षेच्या तयावरीवरुन दोघींमध्ये पुन्हा एकदा भांडण झालं. मुलीने आईला धक्का दिल्या, ज्यानंतर त्यांच्या डोक्याला जखम झाली. यानंतर मुलीने कराटे बेल्टने गळा आवळून आईची हत्या केली. “मुलीने आईचा मृतदेह बेडवर ठेवला आणि आत्महत्या दर्शवण्यासाठी आईच्या मोबाइलवरुन मामाला मेसेज पाठवला. मी सर्व प्रयत्न केले, पण आता माघार घेत असं तिने मेसेजमध्ये लिहिलं होतं,” शवविच्छेदन केलं असता गळा दाबल्याने मृत्यू झाल्याचं उघड झालं. “महिला पोलीस कर्मचाऱ्याने मुलीला विश्वासात घेतलं असता तिने हत्येची कबुली दिली,” असं अधिकाऱ्याने सांगितलं आहे. पोलिसांनी याप्रकरणी गुन्हा दाखल केला आहे.
