जळगाव (प्रतिनिधी) लोकांनी वापरून फेकून दिलेल्या मास्कचा वापर करून गादी तयार करण्याचा धक्कादायक प्रकार आज कुसुंबा शिवारात उघडकीस आला आहे. याप्रकरणी पोलिसांनी एकाविरूध्द गुन्हा नोंदविला आहे.
याबाबत वृत्त असे की, अमजद अहमद मन्सुरी (वय ३८, रा. आझादनगर) याचे कुंसुबा नाका परिसरात महाराष्ट्र गादी भंडार सेंटर नावाचे दुकान आहे. या दुकानाच्या बाहेर मोठ्या प्रमाणात लोकांनी वापरलेल्या मास्कचा ढीगारा होता. तसेच ही माहिती औद्योगिक वसाहत पोलीस स्थानकाला मिळाली होती. यानंतर एमआयडीसी पोलिसांचे पथक रविवारी दुपारी गेले असता त्यांना अमजद अहमद मन्सुरी हा गादीमध्ये चक्क वापरलेले मास्क भरत असल्याचे आढळून आले. त्यानंतर अमजद अहमद मन्सुरी याच्या विरूध्द औद्योगिक वसाहत पोलीस स्थानकात गुन्हा नोंदविण्यात आला आहे.
