धरणगाव (प्रतिनिधी) जळगाव रोडवरील श्री संताजी तेल घना आणि हॉटेल लव फोडून चोरट्यांनी साधारण 35 हजाराचा ऐवज लंपास केल्याची घटना उघडकीस आलीय. याप्रकरणी अज्ञात चोरट्याविरुद्ध गुन्हा दाखल करण्यात आला आहे.
यासंदर्भात अधिक असे की जळगाव रोडवरील रेल्वे स्थानकाच्या पुढे श्री संताजी तेल घाणा आणि हॉटेल लव चिकन शेजारी शेजारी आहेत. तेलघाण्याचे मालक दिनेश गोसावी यांनी 5 मे रोजी रात्री साडेआठ वाजेच्या सुमारास नेहमीप्रमाणे दुकान बंद केले. परंतु दुसऱ्या दिवशी पहाटे साडेसहा वाजेच्या सुमारास दुकान फोडले असल्याचे त्यांच्या लक्षात आले. अज्ञात चोरट्यांनी पंधरा हजार रुपये किमतीची डीव्हीआर मशीन आणि गल्यातील 1500 रुपये रोख त्याचप्रमाणे साधारण 19 हजार रुपये किमतीच्या शेंगदाणा, तीळसह इतर तेलाच्या बाटल्या लंपास केल्या आहेत. तसेच संताजी तेल घाण्याला लागूनच असलेले चंदन राजपूत यांच्या मालकीचे हॉटेल लव चिकनच्या गल्यातील साधारण एक हजार रुपयांची चिल्लर देखील चोरट्यांनी लांबविली आहे. याप्रकरणी दिनेश गोसावी यांच्या फिर्यादीवरून अज्ञात चोरट्याविरुद्ध गुन्हा दाखल करण्यात आला असून पुढील तपास पो.ना. उमेश पाटील हे करीत आहेत.
