अमळनेर (प्रतिनिधी) सासूला मारहाण करीत त्यांच्या अंगावर असलेले सोन्याचे दागिने ओरबडून जावई पळून गेल्याची घटना दि. २४ नोव्हेंबर रोजी जळोद रस्त्यावरील आर्मी स्कुलजवळ घडली. गंभीर जखमी झालेल्या सासूने उपचार घेतल्यानंतर पोलिसात तक्रार दिली. त्यानुसार जावायाविरुद्ध अमळनेर पोलीस ठाण्यात गुन्हा दाखल करण्यात आला आहे.
पारोळा तालुक्यातील अंबापिंप्री येथील मिनाबाई समाधान कोळी या महिलेच्या मुलीचा विवाह पंधरा वर्षांपुर्वी विनोद विक्रम कोळी (रा खंबाळे ता. शिरपूर) याच्याशी झाला होता. तीन वर्षांपूर्वी त्यांच्या मुलीने आत्महत्या करून घेतली होती. तरीही जावाई विनोद कोळी हा सासरवाडीला अंबापिंप्री येथे राहत होता. सहा महिन्यांपूर्वी जावयाने दुसरे लग्न केले तरी तो अंबापिंप्री येथेच राहत होता. चार महिन्यांपूर्वी विनोदची दुसरी पत्नी आणि मिनाबाई यांच्यात भांडण झाल्याने विनोद दुसऱ्या पत्नीसह बिडगाव ता. चोपडा येथे राहायला गेले होते. मिनाबाईचा मुलगा भरत कोळी आणि जावई विनोद कोळी यांच्यात मिनाबाईच्या बदनामीवरून वाद झाला होता.
दुचाकीवरुन नेत मारहाण करत ऐवज नेला लुटून
संशयित विनोद याने दि. २४ नोव्हेंबर रोजी सासू मिनाबाईला फोन करून आपल्याला वाद मिटवायचे असल्याचे सांगत त्यांना पैलाड येथे बोलावले. मिनाबाई या तेथे गेल्या असता, विनोदने तिला मोटरसायकलवर बसवून जळोद रस्त्यावर आर्मी स्कूलच्या पुढे खदानीजवळ नेले. तेथे त्याने कुरापत काढून मिनाबाईच्या गालावर चापटांनी मारले आणि तिच्या कानातील ८ ग्रॅम सोन्याच्या ८ बाह्या आणि १० हजार रुपये किमतीची गळ्यातील २ ग्राम वजनाची सोन्याची पोत असे ५० हजार रुपयांचे दागिने ओरबाडून नेले.
उपचार घेतल्यानंतर दिली पोलिसात तक्रार
मारहाण केल्यामुळे मिनाबाई बेशुद्ध पडल्या होत्या. थोड्या वेळाने प्रवाश्यांच्या मदतीने ती अमळनेर येथे आली. नंतर मुलाच्या मदतीने ग्रामीण रुग्णालयात व नंतर खाजगी रुग्णालयात उपचारासाठी दाखल झाली. उपचार घेतल्या नंतर तिने अमळनेर पोलीस स्टेशनला फिर्याद दिल्यावरून विनोद कोळी याच्याविरुद्ध गुन्हा दाखल करण्यात आला असून तपास पोलीस उपनिरीक्षक नामदेव बोरकर करीत आहेत.
