पहूर ता. जामनेर (प्रतिनिधी) तालुक्यातील पहूर येथील सोनाळा फाट्याजवळ आज पहाटे ५ वाजेच्या सुमारास नाशिक परिक्षेत्र विभागाचे विशेष पोलीस महानिरिक्षक बी.जी.शेखर यांच्या पथकाने गुटख्याचा ट्र्क पकडला. यामध्ये ६० लाख ८० हजारांच्या गुटख्यासह संशयित आरोपींना पथकाने ताब्यात घेतल्याचे कळते.
नाशिक परिक्षेत्र विभागाचे विशेष पोलीस महानिरिक्षक बी.जी.शेखर यांना गोपनीय माहिती मिळाली की, राज्यात बंदी असलेला दिलबाग प्लस पान मसाला, ए प्लस तंबाखू दिल्ली येथून मुंबईकडे जाणार आहे. त्यानुसार बी.जी.शेखर यांनी आपल्या पथकाला कारवाईचे आदेश दिलेत. पोलीस निरिक्षक बापु रोहम, अंमलदार एएसआय रविंद्र ईश्वर शिलावट, एएसआय बशीर गुलाब तडवी, पोलीस कर्मचारी प्रमोद मंडलीक, मनोज दुसाने, नारायण लोहारे यांच्यासह पहूर पोलीस स्टेशनचे एएसआय रविंद्र देशमुख व पोंकाॕ ईश्वर कोकणे यांनी पहूर पोलीस स्टेशन हद्दीतील सोनाळा फाट्याजवळ आज पहाटे ५ वाजेच्या सुमारास ही कारवाई केली.
पहूर पोलीस स्टेशन हद्दीतील सोनाळा फाट्याजवळ छापा टाकण्यात आला. यामध्ये संशयित आरोपी वाहन चालक शराफतअली हसन मोहम्मद (वय ३० रा.चहलका जि.नुहू (हरीयाना)), वाहन मालक इम्रानखान शहाबुद्दीन (रा.घसेरा ,पलवल (हरीयाना), गोलू मॕनेजर व राजू भाटीया गुटखा मालक (रा,दिल्ली) यांना अटक केल्याचे कळते.
