अमळनेर (प्रतिनिधी) येथील स्व.श्री.मधुसूदन सुरजमल मुंदडा माध्यमिक विद्यालय अमळनेर शाळेतील विद्यार्थ्यांनी स्वतः राख्या तयार केल्या व स्व. निर्मितीचा आनंद घेतला. स्वतः तयार केलेल्या राख्या रक्षाबंधनानिमित्त आपल्या देशसेवा करणाऱ्या भावांना पाठविल्या.
शाळेचे या उपक्रमाचे 7 वे वर्ष आहे .सात वर्षापासून सतत प्रत्येक वर्षी जवानांसाठी शाळेतून राख्या पाठवल्या जातात .राख्या बनवितांना विद्यार्थिनींच्या चेहऱ्यावरील आनंद ओसंडून वाहत होता .जवान जीवाची पर्वा न करता परिवाराला सोडून ऊन, वारा ,पाऊस, डोंगर-दऱ्या ,पहाड या ठिकाणी सेवा देत आहेत. अनेक सण उत्सव परिवारात असतात .पण माझा जवान भाऊ त्यावेळेला नसतो .आणि म्हणून एक रेशमचा धागा भावाला बांधून दीर्घायुष्य परमेश्वराकडे मागत असल्याच्या प्रतिक्रिया विद्यार्थ्यांनी व्यक्त केल्या .ही संकल्पना शाळेच्या उपशिक्षिका नेहा पाटील यांनी विद्यार्थ्यांसमोर मांडली असता विद्यार्थ्यांनी त्यास उत्स्फूर्त प्रतिसाद दिला. अनेक विद्यार्थ्यांचे वडील, भाऊ ,काका ,दादा सैन्यात आहेत. त्यांना राख्या पाठवतांना एका डोळ्यात अश्रू तर दुसऱ्या डोळ्यात आनंद दिसत होता .नेहा पाटील यांनी विद्यार्थ्यांना रक्षाबंधनाचे महत्त्व सांगितले. तसेच धनराज महाजन, सुनील पाटील ,किशोर पाटील ,राजेंद्र महाजन यांनी देखिल बहीण भावाच्या नात्याविषयी विद्यार्थ्यांना माहिती दिली .या शाळेच्या उपक्रमाबद्दल संस्थेचे अध्यक्ष प्रकाश मुंदडा तसेच संचालक मंडळ यांनी विद्यार्थ्यांचे कौतुक व अभिनंदन केले.
