पाळधी ता. धरणगाव (प्रतिनिधी) विज्ञान प्रदर्शन हे ग्रामीण भागातील विद्यार्थ्यांच्या सुप्तगुणांना दिशा देणारे एक व्यासपीठ आहे. त्याचा उपयोग करून विद्यार्थ्यांनी राज्य व देशपातळीवर आपल्या शाळेचे नाव उंचवावे. विद्यार्थ्यांना जीवनात यशस्वी व्हायचे असेल तर जे जमते त्याच्यावरच विद्यार्थ्यांनी विशेष लक्ष केंद्रित करावे. वाचन हे महत्वाचे मुलभूत कौशल्य असून वाचन जाणीव पूर्वक शिकले पाहिजे. आनंददायी वाचनाला प्रोत्साहन देण्यासाठी “महावाचन चळवळ” उपक्रम उपयुक्त ठरणार असल्याचे प्रतिपादन पाणीपुरवठा व स्वच्छता विभागचे मंत्री तथा पालकमंत्री ना. गुलाबराव पाटील यांनी केले. ते पाळधी येथिल स. न. झवर माध्यमिक विद्यालयात आयोजित तालुकास्तरीय विज्ञान प्रदर्शन व जिल्हास्तरीय “महावाचन चळवळ ” उपक्रमाच्या उद्घाटन प्रसंगी बोलत होते. मंत्री गुलाबराव पाटील यांच्या सह मान्यवरांनी सहभागी विद्यार्थी व शिक्षकांचे कौतुक केले.
ना. गुलाबराव पाटील पुढे म्हणाले की, आजचे जग विज्ञान शिक्षणावर आधारित आहे. ग्रामीण भागात बुद्धिमत्ता असून तिला योग्य वळण देण्यासाठी शिक्षकांनी आपले ज्ञान अद्ययावत ठेवून मुलांचे दीपस्तंभ व्हावे. विद्यार्थ्यांचा वैज्ञानिक दृष्टिकोन जास्तीत जास्त वाढी साठी शिक्षकांनी सजग रहावे असे आवाहनही त्यांनी केले. कार्यक्रमाच्या प्रास्ताविकात गटशिक्षणाधिकारी डॉ. श्रीमती. भावना भोसले यांनी तालुकास्तरीय विज्ञान प्रदर्शन व जिल्हास्तरीय “महावाचन चळवळ ”उपक्रमाची माहिती सविस्तरपणे विषद केली.
जिल्हाधिकारी आयुष प्रसाद व मुख्य कार्यकारी अधिकारी अंकित यांच्या मार्गदर्शनाखाली शिक्षण विभाग पंचायत समिती, धरणगाव व स. न. झवर विद्यालय पाळधी यांच्या संयुक्त विद्यमाने ५१ वे तालुकास्तरीय विज्ञान प्रदर्शन शाळेच्या आवारात आयोजित करण्यात आले होते. सदर विज्ञान प्रदर्शनात माध्यमिकचे ४८ तर प्रथामिकाचे ५७ अश्या एकूण १०५ शाळांनी सहभाग नोंदवून, विद्यार्थ्यांनी आपल्या विविध प्रकल्पांचे यशस्वी सादरीकरण केले. सदर कार्यक्रमाला संपूर्ण तालुक्याभरातून विविध शाळांनी प्रतिसाद देत शिक्षक वृंद व विद्यार्थ्यांनी मोठ्या प्रमाणावर उपस्थिती लावली. सदर विज्ञान प्रदर्शनाचे परीक्षणाचे कार्य केंद्रप्रमुख श्रीमती मनीषा सोनवणे , एच. झेड. पाटील , कर्णसिंग पाटील, प्रदीप नारखेडे व एम. एस. कांडेलकर यांनी केले.
जिल्हास्तरीय“महावाचन चळवळ ” आणि विज्ञान प्रदर्शनाचे उद्घाटन पालकमंत्री गुलाबरावजी पाटील यांच्या हस्ते करण्यात आले. सदर उद्घाटन समारंभास डॉ अनिल झोपे प्राचार्य डायट जळगाव जिल्हा परिषदेचे प्राथमिक शिक्षणाधिकारी विकास पाटील , माध्यमिक शिक्षण अधिकारी सौ. किरण कुवर , जिल्हा परिषद सदस्य प्रतापराव पाटील, गट शिक्षणाधिकारी डॉ. श्रीम. भावना भोसले , एरंडोल शिक्षण प्रसारक मंडळ अध्यक्ष शरद काबरा, स.न झवर विद्यालय चेअरमन विजय झवर, न्यू इंग्लिश स्कूलचे चेअरमन प्रवीण झवर, एरंडोल शिक्षण प्रसारक मंडळचे संजय काबरा , जिल्हा प्रमुख निलेश पाटील, पाळधी बु. चे सरपंच विजय पाटील , उपसरपंच राहुल धनगर, माजी सभापती मुकुंराव नन्नवरे, रविद्र चव्हाण सर, संजय महाजन, मनोज बियाणी , नाना पाटील सर , केंद्रप्रमुख प्रमोद सोनवणे, न्यू इंग्लिश स्कूल च्या मुख्याध्यापिका सौ. के. एस. पाटील, स. न. झवर विद्यालयाच्या मुख्याध्यापिका सौ. एस.व्ही. तोतला, आदी मान्यवर उपस्थित होते. कार्यक्रमाचे ईशस्तवन व स्वागत गीत स. न. झवर विद्यालयाच्या मुलीनी केले.
सदर ५१ व्या तालुकास्तरीय विज्ञान प्रदर्शनाचे यशस्वीतेसाठी स.न.झवर व न्यू इंग्लिश स्कूल पाळधी मधील सर्व शिक्षक व शिक्षकेतर कर्मचारीवृंद , सर्व केंद्रप्रमुख ,गटसाधन केंद्रातील अधिकारी व कर्मचारी ,प्राथमिक व माध्यमिक शिक्षक संघटना, धरणगाव तालुका विज्ञान अध्यापक मंडळ व धरणगाव तालुक्यातील सर्व शिक्षक व शिक्षकेतर कर्मचारी यांचे अनमोल सहकार्य लाभले. सदर कार्यक्रमाचे बहारदार सूत्रसंचालन सौ. ज्योती राणे यांनी केले तर आभार प्रदर्शन केंद्र प्रमुख प्रमोद सोनावणे यांनी मानले.
