अमळनेर (प्रतिनिधी) तालुक्यातील आदीवासी वस्तीगृह बांधकामाच्या जुन्या बिलांच्या मोबदल्यात अडीच लाखांच्या लाचेच्या मागणी करणाऱ्या उपविभागीय अभियंता आणि कनिष्ठ अभियंता यांना आज लाचलुचपत विभागाने अटक केली आहे.
याबाबत अधिक माहिती अशी की, तक्रारदार यांनी अमळनेर तालुक्यातील आदीवासी मुलींच्या वस्तीगृहाच्या बांधकामाचा ठेका घेतला होता. यासंदर्भात धुळे येथील बांधकाम कंपनीने करार करून घेतला आहे. आदीवासी वस्तीगृहाच्या बांधकामाच्या आतापर्यंतच्या दिलेल्या बिलाच्या मोबदल्यात संशयित आरोपी उपविभागिय अभियंता दिनेश पाटील आणि कनिष्ठ अभियंता सत्यजित गांधीलकर यांनी २ लाख ५८ हजार रूपयांची लाचेची मागणी केली. तक्रारदार यांनी लाचलुचपत विभागाकडे यासंदर्भात तक्रार दिली. ८ जून २०२० रोजी लाचलुचपत विभागाने सापळा रचून दोघांची चौकशी केली असता दोघांनी तक्रारदार यांच्याकडे लाचेची मागणी केल्याचे निष्पन्न झाले. यामुळे सार्वजनिक बांधकाम विभागात खळबळ उडाली आहे. त्यानुसार दोघांवर अमळनेर पोलीस ठाण्यात गुन्हा दाखल करण्यात आला आहे. याप्रकरणी पुढील तपास अमळनेर पोलीस कर्मचारी करीत आहे.
