धरणगाव (प्रतिनिधी) येथील संजय तोडे यांच्या खात्यावर अचानक 1 लाख १० हजार रुपयांच्या जवळपास रक्कम जमा झाली होती. परंतु त्यांनी कोणताही मोह न बाळगता लागलीच धरणगाव येथील बँकेशी संपर्क करून सदरची रक्कम ही संबंधितांना परत केल्याने सर्वत्र संजय तोडे यांचे कौतुक होत आहे.
या संदर्भात अधिक माहिती अशी की, दि. ४ एप्रिल रोजी राष्ट्रीय स्वयंसेवक संघाचे कार्यकर्ते तसेच धरणगाव महाविद्यालयचे कर्मचारी संजय तोडे यांच्या युनियन बँक खात्यामधे १,०९,९०० रूपये जमा झाले असा मेसेज त्यांना आपल्या मोबाईलवर आला. तोडे यांना हे कळताच त्यांनी बँकमध्ये संपर्क साधत कुणीतरी आपल्या खात्यातमध्ये चुकुन पैसे टाकले आहेत, असे बँक कर्मचारींना कळवले.
यानंतर लक्ष्मण सुर्यवंशी (रा.बांभोरी) जे सध्या पुण्यात कामाला आहेत, यांनी काँल करत बँकखाते नंबर चुकल्यामुळे, माझ्या आईच्या खात्याऐवजी तुमच्या खात्यात पैसे जमा झाले असे सांगितले. यावेळी बँक अधिकाऱ्यांनी त्यांना सांगितले की, काळजी करण्याचे काही कारण नाही, तुमचे पैसे तुम्हाला मिळतील.
संबंधित रक्कम आज दिनांक ६ रोजी पुषपावती फकिरा सुर्यवंशी यांच्या नावाने आपल्या खात्यातून १,०९,९०० चा चेक बनवून त्यांचे सगळे पैसे संजय तोडे यांनी परत केले. संजय तोडे यांचा प्रामाणिकपणा तसेच ईमानदारीचे धरणगावात सर्वत्र कौतुक होत आहे.
