भुसावळ (प्रतिनिधी) आगामी दिवाळी व पुढील महिन्यातील नाताळ सणानिमित्त प्रवाशांची होणारी गर्दी लक्षात घेता मध्य रेल्वेने बुधवार, ८ नोव्हेंबरपासून सुरत-ब्रह्मपूर साप्ताहिक विशेष गाडी चालविण्याचा निर्णय घेतला आहे.
या गाडीच्या अप व डाउन अशा प्रत्येकी आठ फेऱ्या होणार असून, डिसेंबरअखेरपर्यंत ही रेल्वे धावणार आहे. ०९०६९ सुरत-ब्रह्मपूर विशेष एक्स्प्रेस ८ नोव्हेंबर ते २७ डिसेंबर या कालावधीत सुरत स्थानकावरून प्रत्येक बुधवारी दुपारी २:२० वाजता सुटेल व शुक्रवारी ब्रह्मपूर येथे रात्री १:१५ वाजता पोहोचेल. ही गाडी अकोला स्थानकावर बुधवारी रात्री ९:३२ वाजता येईल परतीच्या प्रवासात ०९०७० ब्रह्मपूर- सुरत एक्स्प्रेस १० नोव्हेंबर ते २९ डिसेंबर या कालावधीत ब्रह्मपूर स्थानकावरून प्रत्येक शुक्रवारी पहाटे ३:३० वाजता सुटेल व सुरत येथे शनिवारी दुपारी १:४५ वाजता पोहोचेल. ही गाडी अकोला स्थानकावर शनिवारी पहाटे ४:३९ वाजता येणार आहे.
या गाडीला नंदुरबार, धरणगाव, जळगाव, भुसावळ, अकोला, वर्धा, वारंगल, विजयवाडा, विजयनगरम या स्थानकांवर थांबा असणार आहे. या गाडीला एक प्रथम श्रेणी वातानुकूलित, दोन द्वितीय श्रेणी वातानुकूलित, सहा तृतीय श्रेणी वातानुकूलित, आठ द्वितीय श्रेणी शयनयान व तीन जनरल डबे राहणार आहेत.
