नवी दिल्ली (वृत्तसंस्था) देशात कोरोनाची रुग्णसंख्या आणि मृत्यूच्या संख्येत वाढ होऊ लागली आहे. या पार्श्वभूमीवर देशाचे पंतप्रधान नरेंद्र मोदी यांनी देशवासीयांशी संवाद साधला. कोरोनाच्या संकटात संयम कायम राखला पाहिजे. नागरिकांनी नियम पाळून देशाला लॉकडाऊनपासून वाचवलं पाहिजे. राज्यांनी देखील लॉकडाऊनला अंतिम पर्याय म्हणून पाहावं. तसेच राज्यांनी मायक्रो कंटेन्मेंट झोनवर लक्ष केंद्रित केलं पाहिजे, असं पंतप्रधान नरेंद्र मोदी यांनी म्हटलं.
देशात अनेक राज्यांनी निर्बंध कडक केले आहे, तर काही राज्यांनी वीकेंड लॉकडाऊन लागू केलं आहे. देशातील विविध राज्यांच्या कोरोना परिस्थितीवर भाष्य करताना पंतप्रधान नरेंद्र मोदी म्हणाले की, लॉकडाऊन हा शेवटचा पर्याय असायला हवा. लॉकडाऊन लावण्याची वेळ येऊ नये. कोरोना संकटात नागरिकांचे जीव वाचले पाहिजेत. मात्र देशाचं अर्थचक्रही सुरु राहिलं पाहिजे. त्यामुळे ‘दवाई भी कडाई भी’ याचं पालन सर्वांनी केलं पाहिजे. तरुणांना या संकटाना पुढे येऊन मदत केली पाहिजे.
गेल्यावर्षी कोरोनाची लाट आली त्यावेळी स्थिती याही पेक्षा बिकट होती. पहिल्या लाटेत आपल्याकडे कोरोनाविरुद्धची लढण्यासाठी पुरेशा आरोग्य सुविधा नव्हत्या. मात्र आता आपल्याकडे लस आहे, पीपीई किट, मास्क, कोरोना टेस्टिंगची सुविधा आहे. आरोग्य यंत्रणेनं खुप मोठं काम केलं आहे, अनेकांचे प्राण वाचवले आहेत, असं मोदी यांनी म्हटलं.
भारताकडे आज दोन मेड इन इंडिया लस आहेत. देशात मोठ्या प्रमाणात लसींची निर्मिती केली जात आहे. तसेच जगातील सर्वात स्वस्त लस भारतात आहे. त्यामुळेच भारतात मोठ्या प्रमाणात लसीकरण होत आहे. जगभरात सर्वात वेगवान लसीकरण भारतात होते आहे. येत्या १ मे पासून १८ वर्षावरील सर्वांना कोरोना लस देण्यात येणार आहे. तरुण आज कामानिमित्त बाहेर फिरत आहेत. त्यांचं लसीकरण महत्त्वाचं आहे.
या संकटकाळात अधिकाधिक लोकांनी पुढे यावं आणि देशवासीयांना मदत करावी. युवकांनी आपल्या सोसायटीमध्ये, परिसरात छोट्या छोट्या समित्या तयार करून कोरोना नियमांचं पालन करण्यासाठी मदत करावी. असं केलं, तर सरकारांना कर्फ्यू किंवा लॉकडाऊन लावण्याची गरजच पडणार नाही.
