मुंबई (वृत्तसंस्था) आमच्या नशिबाने शिवसेना बंडबाबत ज्या याचिका दाखल करण्यात आल्या त्यातून अनेक गोष्टी स्पष्ट झाल्या आहेत. विधिमंडळ पक्ष आणि राजकीय पक्ष वेगळा आहे. मुख्य प्रतोद व्हीप निवडण्याचा अधिकार हा फक्त पक्ष अध्यक्षांना आहे. विधानसभा एक गट बाहेर जातो आणि पक्ष म्हणतो त्याला तसा अधिकार नाही. त्यामुळे अजित पवारांच्या फुटीर गटाला पक्ष म्हणून मान्यता नाही. त्यांच्याकडे फक्त विलीन होण्याचा पर्याय आहे, असा दावा जितेंद्र आव्हाड यांनी केला. यावेळी त्यांनी महाराष्ट्रातल्या सत्तासंघर्षावर सरन्यायाधीश धनंजय चंद्रचूड यांनी दिलेल्या निकालाचे दाखले देत अजित पवार यांच्या दाव्यातली हवा काढून टाकली.
अजित पवार, प्रफुल्ल पटेल आणि सुनील तटकरे यांची पत्रकार परिषद झाल्यानंतर तातडीने जितेंद्र आव्हाड बोलले. तसेच अजित पवार यांनी केलेल्या नियुक्त्या चुकीच्या असल्याचा दावाही त्यांनी केला. अजित पवारांनी केलेल्या नियुक्त्या कायदेशीर आहेत आहेत का? राष्ट्रवादी काँग्रेस पक्षाचे अध्यक्ष हे शरद पवार आहेत स्वतः अजित पवार, प्रफुल्ल पटेल यांनीही ते मान्य केलं आहे. मग अजित पवारांनी केलेल्या नियुक्त्या घटनात्मक कशा काय? सुनील तटकरे आणि प्रफुल्ल पटेल यांना निलंबित करण्यात आलं आहे. त्यांना कोणतेच अधिकार नाहीत असं आव्हाड यांनी म्हटलं आहे.
अजित पवार आणि पटेल यांच्या पत्रकार परिषदेमध्ये विविध पदे वाटण्यात आली, त्यांना संविधानिक मान्यता नाही. एकच राष्ट्रवादी पक्ष आहे, त्यांचे अध्यक्ष शरद पवार आहेत. ते सुद्धा मान्य करताय. पार्टी अध्यक्षाचे अधिकार काय आहेत?. शरद पवारांनी प्रफुल्ल पटेल आणि सुनील तटकरे यांना निलंबित केले आहे, असे आव्हाड म्हणाले. पक्षाध्यक्षाला लपवून तुम्ही पक्ष विरोधी कारवाया करण्यासाठी प्रवृत्त केले, त्यामुळे त्यांना दोघांना निलंबित केलं आहे. तिथे सगळे नेते म्हणतात अध्यक्ष शरद पवार आहेत. मग प्रश्न उरतो नैतिकतेचा ? मग तुम्ही प्रफुल्ल पटेल यांनी सुनील तटकरे वर केलेली कारवाई मानता की नाही ? शरद पवार जयंत पाटील म्हणाले यामध्ये कायदेशीर कारवाई केली पाहिजे. कायद्याच्या अज्ञानापोटी केलेल्या नियुक्त्याना मान्यता मिळत नाही, असे जितेंद्र आव्हाड म्हणाले.
