जळगाव (प्रतिनिधी) – महावितरणच्या एरियल बंच केबलमध्ये विनापरवाना छेडछाड करून अनधिकृत वीज वापरासाठी मार्ग उपलब्ध करून दिल्याप्रकरणी तसेच इतर व्यक्तींना वीज वापरण्यास सहाय्य होईल असे कृत्य केल्याप्रकरणी चाळीसगावात एकावर गुन्हा दाखल करण्यात आला आहे.
याप्रकरणी महावितरणच्या चाळीसगाव शहर कक्ष क्र.२ चे सहायक अभियंता अखिलेश नंदनवार यांनी दिलेल्या फिर्यादीत म्हटले आहे की, २० ऑगस्ट २०२६ रोजी सायंकाळी ७ वाजेच्या सुमारास तंत्रज्ञ रवी ठोंबरे व बाह्यस्त्रोत कर्मचारी मिलींद राजपुत स्टेशन रोड परिसरातील अनिलनगर भागातून जात असताना महावितरणच्या विद्युत खांबावरील लघुदाब वाहिनीच्या एरियल बंच केबलमध्ये सबीर सय्यद उर्फ सोनू (रा. अनिलनगर, स्टेशन रोड, चाळीसगाव) हा छेडछाड करीत असताना दिसला. तो केबलमध्ये छेडछाड करीत असतानाचा व्हिडिओ मोबाईलमध्ये रेकॉर्ड केला. त्यानंतर सहायक अभियंता नंदनवार यांनी घटनास्थळी धाव घेतली. ठोंबरे व राजपूत यांनी त्यांना व्हिडिओ दाखविला असता त्यात त्या विद्युत खांबावरील लघुदाब वाहिनीच्या एरियल बंच केबलला एक इसम छेडछाड करीत असताना व त्याने जोडणी केलेल्या वायर ओढत असताना दिसला. या इसमाचे नाव सबीर सय्यद उर्फ सोनू असे असल्याचे समजते. तंत्रज्ञ ठोंबरे यांनी खांबावर चढून खात्री केली असता केबलचे इन्सुलेशन काढलेले व त्यातील वीजवाहक तार खुली झालेली दिसून आली. सबीर सय्यद उर्फ सोनू याने महावितरण कंपनीच्या मालकीच्या एरिअल बंच केबलमध्ये कोणतीही अधिकृत परवानगी नसताना जाणूनबुजून छेडछाड केली, अनधिकृत वीजवापरासाठी मार्ग उपलब्ध करून दिला व इतर व्यक्तींना वीज वापरण्यास सहाय्य होईल, असे कृत्य केल्याची खात्री झाली.
सहायक अभियंता अखिलेश नंदनवार यांच्या फिर्यादीवरून आरोपी सबीर सय्यद उर्फ सोनू याच्यावर चाळीसगाव पोलीस ठाण्यात भारतीय विद्युत कायद्याच्या कलम १३८ अन्वये सोमवारी गुन्हा दाखल करण्यात आला.
