जळगाव (प्रतिनिधी) – जबरी चोरी, घरफोडी, सरकारी नोकरावर हल्ला यासह वेगवेगळे ११ गंभीर गुन्हे दाखल असलेल्या तन्वीर उर्फ तन्या रहीम शेख (वय २१, रा. गेंदालाल मिल परिसर) याला येरवाडा कारागृहात स्थानबद्ध करण्यात आले. तसे आदेश जिल्हाधिकारी रोहन घुगे यांनी दिले. गणेशोत्सवाच्या पार्श्वभूमीवर एमपीडीए अंतर्गत ही कारवाई करण्यात आली.
आगामी काळातील गणेशोत्सवाच्या पार्श्वभूमीवर जिल्हा पोलीस दलाकडून कायदा व सुव्यवस्थेचा प्रश्न निर्माण करणाऱ्यांवर कारवाईचा बडगा उगारला आहे. शहरातील गेंदालाल मिल परिसरातील तन्वीर शेख याच्याविरुद्ध शहर पोलिस ठाण्यात २ जबरी चोरी, १ सरकारी नोकरावर हल्ला, ४ दुखापत, १ दुखापतसह दंगा, १ घरफोडी, १ आर्म अॅक्ट असे ११ गुन्हे दाखल आहेत. तसेच १३ अदखलपात्र गुन्हेही दाखल आहे. त्याच्यावर प्रतिबंधक कारवाई करूनदेखील त्याच्यात सुधारणा न झाल्याने पोलिस निरीक्षक सागर शिंपी यांनी त्याच्या एमपीडीएचा प्रस्ताव पोलिस निरीक्षक श्रीकांत धिवरे यांच्याकडे पाठविला.
जिल्हाधिकाऱ्यांनी दिली एमपीडीए प्रस्तावाला मंजुरी
स्थानिक गुन्हे शाखेचे पोलिस निरीक्षक राहुल गायकवाड, सहायक फौजदार सुनील दामोदरे, जयंत चौधरी, रफीक शेख, संदीप चव्हाण यांनी हा प्रस्ताव जिल्हाधिकाऱ्यांच्याकडे पाठविला. त्यांनी त्यास मंजुरी देत स्थानबद्धतेचे आदेश दिले. त्यानुसार त्याला येरवाडा कारागृहात स्थानबद्ध करण्यात आले.
