नांदेड (वृत्तसंस्था) टेम्पो व मॅजीकची समोरासमोर धडक होऊन झालेल्या भीषण अपघातात ५ जण ठार, तर ३ जण गंभीर जखमी झाल्याची घटना भोकर-नांदेड रस्त्यावर सीताखांडी घाटात सोमवारी दुपारी घडली.
नेमकं काय घडलं !
भरधाव वेगात नांदेडकडे येणारा टेम्पो व नांदेडकडून भोकरकडे येणारी टाटा मॅजीकची भोकर-नांदेड रस्त्यावर सीताखांडी घाटात समोरासमोर जोराची धडक झाली. या अपघात पाच जणांचा जागीच मृत्यू झाला. मृतांमध्ये मयतांमध्ये भुलाबाई गणेश जाधव (वय ४५, रा. पोटातांडा, ता. हिमायतनगर), संदीप किशनराव किसवे (वय २६, रा. हळदा, ता. भोकर), संजय इरबा कदम (वय ४८, रा. हिमायतनगर), बापूराव रामसिंग राठोड (वय ५७, रा. पाकीतांडा, ता. भोकर) आणि अनुसया बाई राठोड यांचा तर जखमींमध्ये परमेश्वर केशव महाजन (रा. इरसनी), कैलास गणपत गडमवार (रा. सिरंजणी, ता. हिमायतनगर), मंगेश गोविंदराव डुकरे (वय २२, रा. लहान, ता. अर्धापूर) आणि देवीदास गणेश जाधव (रा. पोटातांडा) यांचा समावेश आहे.
मृतांना काढण्यासाठी वाहनाचा पत्रा कापावा लागला !
जखमींवर येथील ग्रामीण रुग्णालयात वैद्यकीय अधीक्षक अनंत चव्हाण, वैद्यकीय अधिकारी सागर रेड्डी किनीकर, वैद्यकीय अधिकारी व्ही. सी. थोरवट, मयूरी कलटवार यांनी उपचार करून पुढील उपचारासाठी नांदेडला पाठविले. अपघात इतका भयंकर होता की, मॅजिकमधील मृतांना काढण्यासाठी पत्रा कापावा लागला. या अपघातातील काही गंभीर जखमींना घटनास्थळाहूनच नांदेडला रवाना करण्यात आल्याने, मयत व जखमींचा आकडा वाढण्याची शक्यता वर्तविण्यात येत आहे.
पती-पत्नीचाही मृत्यू !
या अपघातातील मयतांमध्ये बापुराव रामसिंग राठोड आणि अनुसयाबाई बापुराव राठोड या पती- पत्नीचा समावेश आहे. यापैकी बापुराव यांचा मृत्यू घटनास्थळीच झाला तर अनुसयाबाई यांना गंभीर अवस्थेत उपचारार्थ नांदेड येथे हलविले होते. नांदेड येथे त्यांना मयत घोषित केले. या दुर्घटनेमुळे राठोड परिवारावर दुःखाचा डोंगर कोसळला आहे.
