गोंदिया (वृत्तसंस्था) मुलानेच आईचा चाकूने गळा चिरून खून केल्याचा खळबळजनक प्रकार शहरातील श्रीनगर चंद्रशेखर वॉर्डात उघडकीस आली. संध्या महेन्द्र कोरे (४८, वय ४८, रा. चंद्रशेखर वॉर्ड, गोंदिया) असे मृत महिलेचे नाव तर करण महेन्द्र कोरे (२४) असे आरोपी मुलाचे नाव आहे,
शहरातील श्रीनगरच्या चंद्रशेखर वॉर्डातील सदाराम तुकाराम उके यांच्या घरी भाड्याच्या खोलीत राहणाऱ्या संध्या महेंद्र कोरे (४८) यांचा खून करण्यात आला. संध्या कोरे हिला रायपूर येथे दिले होते. तिचे पती २० वर्षांपूर्वी मृत्यू पावल्याने ती माहेरी येऊन गोंदियात भाड्याने राहू लागली, संध्याला एक मुलगा व एक मुलगी आहे. मुलीचे लग्न झाल्याने ती सासरी गेली. माय-लेक श्रीनगरच्या चंद्रशेखर वॉर्डात राहात होते, करण कोरे हा नागपूरला एमआरशिप करीत होता.
७ जूनच्या पहाटे ३:५८ वाजता एका अनोळखी व्यक्तीने धारदार शस्त्राने व वरवंट्याने मारून खून केला, तर आपल्याला गंभीर जखमी केल्याचा करणने आपल्या मामाला फोन केला. मामा प्रकाश कवडू पाथोडे (४३) हे मोटारसायकलने चंद्रशेखर वॉर्ड येथील संध्या कोरे यांच्या खोलीवर गेले. यावेळी त्यांना आपली बहिण संध्याचा मृतदेह किचनमध्ये पडलेला दिसला. तिच्या डोक्याला व गळ्याला गंभीर जखमा होत्या. त्या खोलीत रक्त्ताचे थारोळे पडले होते. बेडरूममध्ये पलंगावर दगडाचा वरवंटा पडलेला होता. तर मुलगा करण कोरे हा संध्याच्या शेजारी पडलेला होता. त्याच्या डाव्या हाताला व कपाळावर जखमा होत्या.
मुलाला जखमी अवस्थेत गोंदिया वैद्यकीय महाविद्यालयात उपचारार्थ दाखल करण्यात आले. आज, गुरुवारी त्याला रुग्णालयातून सुटी देण्यात आली. पोलिसांनी घटनेसंदर्भात त्याची विचारपूस केली. पण तो काहीही बोलत नव्हता. शेवटी पोलिसी खाक्या दाखवताच त्याने आईचा खून केल्याची कबुली दिली. कुणीतरी अज्ञाताने आईचा खून केला आणि आपल्यालाही मारहाण केली, असा बनाव आपणच रचला होता.
आई संध्या कोरे हिचा काळ्या जादूवर विश्वास होता. ती गुप्तधन शोधत होती. यासाठी कमावलेली रक्कम जमा झाल्यावर ती अंधश्रद्धेवर खर्च करीत होती. संध्याच्या चारित्र्यावरही करणला संशय होता. चारित्र्यावरून मायलेकात वाद देखील झाला होता. या वादात ७ जूनच्या पहाटे ३ ते ४ वाजताच्या दरम्यान घरात ठेवलेला धारदार चाकू उचलून आईचा गळा चिरला. रागाच्या भरात तिच्या चेहऱ्यावर व शरीरावर वार करून तिची निर्घृण हत्या केल्याची कबुली आरोपी मुलाने पोलिसांना दिली. पोलिसांनी आरोपी मुलाला अटक केली आहे.
