जम्मू- काश्मीर (वृत्तसंस्था) दहशतवाद्यांनी पुन्हा भ्याड कृत्य केले आहे. जम्मू-काश्मीरच्या सोपोरेमध्ये मोठा दहशतवादी हल्ला करण्यात आला आहे. दहशतवाद्यांनी सीआरपीएफ आणि पोलीस पथकावर हा हल्ला केला आहे. या हल्ल्यात भारतीय लष्कराचे दोन जवान शहीद झाले असून दोन नागरिकांचा मृत्यू झाला आहे.
काश्मीरच्या उत्तरेकडील सोपोर येथील आरामपोरा परिसरात अतिरेक्यांनी हा हल्ला केला. अतिरेक्यांनी पोलीस आणि सीआरपीएफच्या टीमला लक्ष्य केलं होतं. त्यामुळे पोलिस आणि जवानांनीही अतिरेक्यांच्या हल्ल्याला प्रत्युत्तर देत गोळीबार केला. मात्र, अचानक झालेल्या हल्ल्यात दोन पोलीस शहीद झाले असून दोन नागरिक ठार झाले आहेत. अंधाधुंद गोळीबार केल्यानंतर या अतिरेक्यांनी घटनास्थळावरून पळ काढला. मात्र, जवानांनी या संपूर्ण परिसराला घेराव घातला असून संपूर्ण परिसरात सर्च ऑपरेशन सुरू करण्यात आलं आहे.
सोपोर येथील मंजूर अहमद शल्ला आणि बशीर अहमद या दोन नागरिकांचा मृत्यू झाला. दहशतवादी हल्ला झाला त्यावेळी हे दोघंही रस्त्यावर चालत होते. या दहशतवादी हल्ल्यामागे लष्कर ए तोयबाचा हात असल्याची माहिती काश्मीरचे आयजी विजय कुमार यांनी दिली.
