मुंबई (वृत्तसंस्था) देशात कोरोनाची सर्वाधिक रुग्णसंख्या असलेल्या राज्यांच्या यादीत महाराष्ट्र पहिल्या क्रमांकावर आहे. अशात राज्यात लसीकरण मोहिम वेगानं राबवण्यासाठी एक मोठा निर्णय घेण्यात आला आहे. राज्य सरकारनं एक मेपासून सुरू होणाऱ्या तिसऱ्या टप्प्यातील लसीकरणात १८ वर्षावरील सर्वांनादेखील मोफत लस देण्याची घोषणा केली आहे. ठाकरे सरकारच्या या निर्णयामुळे लसीकरण अधिक वेगानं होण्यास मदत होणार आहे.
महाराष्ट्रात १८ वर्षांवरील सर्वांना मोफत लस देण्यात येणार आहे. त्यासाठी स्वस्त दरात आणि चांगली लस उपलब्ध व्हावी म्हणून जागतिक टेंडर काढण्यात येणार आहे. मोफत लसीकरणाचा कार्यक्रम राज्य सरकारच्या तिजोरीतून हाती घेण्यात येणार असल्याची माहिती राष्ट्रवादी काँग्रेसचे राष्ट्रीय प्रवक्ते आणि अल्पसंख्याक मंत्री नवाब मलिक यांनी दिली. केंद्र सरकारने एक मे पासून देशभरात १८ वर्षावरील लोकांना लसीकरण करण्याचा निर्णय जाहीर केला आहे.
“कोविडशील्ड केंद्राला दीडशे रुपये, राज्याला ४०० रुपये आणि खासगींना ६०० रुपये राहणार आहे. कोव्हॅक्सिनची किंमत सुद्धा ६०० रुपये राज्यांना आणि १२०० रुपये खासगींना जाहीर झाली आहे,” असेही नवाब मलिक म्हणाले.
