जळगाव (प्रतिनिधी) टिळकनगर पोलीस ठाण्यातून सब इन्सपेक्टर विनायक बाबर बोलतोय, तुमच्या आधार कार्डचा गैरवापर झाला आहे . तुमच्या विरुध्द ईडी कार्यालयात तक्रार नोंद असून तुमचे पकड वारंट निघाले आहे. ही कारवाई थांबविण्यासाठी तत्काळ रक्कम भरणा करा, असा दम भरत सायबर ठगानी भुसावळ येथील अभियंत्याला १५ लाखात गंडविल्याची घटना उघडकीस आली आहे. याप्रकरणी गुरुवारी सायबर पोलीस ठाण्यात गुन्हा दाखल करण्यात आला आहे.
भुसावळ येथील अभियंत्याला दि. २६ रोजी फोन आला. बीएसएनएल कार्यालयातून बोलत असून तुमचा फोन दोन तासांनी बंद करण्यात येईल, असा सायबर ठगाने दम भरला. तक्रारदाराने कारण विचारताच संशयित म्हणाला, तुमच्या मोबाईल क्रमांकावरुन गैरप्रकार केल्याचे समोर आले आहे. यासंदर्भात तुमच्या बद्दल लीगल अॅडव्हरस्टींग गेमबीलींग मुंबई येथे तक्रार दाखल आहे. त्यानंतर तुमचा कॉल पोलीस स्टेशनला ट्रॉन्सपर करतो म्हणत संशयिताने कॉल बंद केला. त्यानंतर त्यांच्या व्हॉट्सअपवर कॉल आला आणि समोरील व्यक्तीने आपण विनायका बाबर सब पोलीस इन्स्पेक्टर, टिळकनगर पोलीस ठाणे येथुन बोलत असून तुमच्याविषयी आमच्याकडे तक्रार दाखल असून त्यांनी आधारकार्डची मागणी केली.
पोलीस अधिकाऱ्याचा फोन असल्याचे समजून तक्रारदाराने विश्वास ठेवत त्यांचे आधार कार्ड व्हॉटसअॅपने पाठविले. तक्रारदार यांनी हा प्रकार त्यांच्या परिवार व मित्रांना सांगितले असता तुमची कोणीतरी फसवणुक करत आहे, अशी भीती व्यक्त केली. त्यानंतर तक्रारदार यांनी गुरुवारी सायबर पोलीस ठाण्यात तक्रार दिली. त्यानुसार अज्ञात ऑनलाईन ठगांविरुद्ध सायबर पोलिसात गुन्हा दाखल करण्यात आला आहे.
बनावट रिपोर्टसह ईडीचे पत्र पाठविले त्या तोतया अधिकाऱ्याने तुमच्या कार्डाचा गैरवापर झालेला असून त्या अधिकाऱ्याने तक्रारदाराच्या व्हॉटसअॅपवरुन क्राईम ब्रेन्च मुंबई यांचा एक रिपोर्ट बनावट पत्र पाठविले. आरबीआय बॅकंचे तक्रारदाराच्या नावाचे पत्रही पाठविले. त्यानंतर विनायक बाबर याने तक्रारदाराच्या व्हाटसअॅपवर ईडी कार्यालयाचे पत्र पाठवित त्यांना सुपेरिअर ऑफिसर विश्वाास नांगरे पाटील यांना कॉन्फरन्समध्ये घेत असल्याची थाप दिली.
तुमच्या विरुध्द ईडीच्या ऑफिसला तक्रार नोंद झाली आहे. त्यावर तुमचे पकड वारंट असून ते थांबविण्यासाठी तुम्हाला काही तरी सेटलमेंट करुन रक्कम भरावी लागेल. तसेच मी सांगेल त्याप्रमाणे काम करावे लागेल. आपल्यात झालेली चर्चा नॅशनल सुक्युरिटी म्हणून कोणाला बोलू नका, असाही तक्रारदाराला दम भरला. त्यापोटी तक्रारदाराकडून गोमती नगर शाखेच्या खात्यात १५ लाखाची रक्कम आरटीजीएसमार्फत भरली. त्यानंतर पैसे भरल्याच्या रक्कमेची स्लिप विनायक बाबर यांना व्हॉटसअॅपवर पाठवली.
