जळगाव (प्रतिनिधी) खान्देशात कवयित्री बहिणाबाई चौधरी, माजी राष्ट्रपती प्रतिभाताई पाटील यांच्यासारख्या अनेक कर्तृत्त्ववान महिला घडल्या. जिल्हा मार्केटींग सोसायटीच्या चेअरमन शैलजादेवी दिलीपराव निकम यांचेही राजकारण, समाजकारण, सहकार, कृषी आदी क्षेत्रातही उल्लेखनीय कार्य आहे. अशा नारीशक्तीचा सन्मान करणे, हे आपल्या भारतीय संस्कृतीचे प्रतिक आहे, असे प्रतिपादन विधानसभेचे माजी अध्यक्ष अरुणभाई गुजराथी यांनी केले.
राजनंदिनी बहुउद्देशिय संस्थेतर्फे शैलजादेवी निकम यांना नारीरत्न पुरस्कार २०२०-२१ चे वितरण महापौर जयश्री महाजन यांच्या हस्ते करण्यात आले. हा पुरस्कार वितरण सोहळा रविवारी दुपारी व.वा.वाचनालयाच्या अग्रवाल सभागृहात झाला. याप्रसंगी अरुणभाई गुजराथी बोलत होते. व्यासपीठावर महापौर जयश्री महाजन, सिंगल वुमन फाउंडेशनच्या अध्यक्षा मीनाक्षी चव्हाण, सत्कारमूर्ती शैलजादेवी निकम, संस्थेच्या अध्यक्षा संदिपा वाघ उपस्थित होत्या.
निकम यांचे कार्य प्रेरणादायी
प्रत्येक क्षेत्रात महिला आज यशस्वीरित्या काम करीत आहेत. महिलांना कमी समजण्याचा प्रयत्न कोणी करू नये. तिला आव्हान देऊन अडचणीत आणणारे तोंडघशीच पडले आहेत. शैलजादेवी निकम यांनी केलेले कार्य सर्व महिलांसाठी प्रेरणादायी आहे. अशा महिलांच्या कार्यापासून इतर महिलांना मोठे काम करण्याची उर्जा मिळते, असे मत महापौर जयश्री महाजन यांनी व्यक्त केले. चोपडा तालुक्यासह इतर भागातील विकास आणि विविध क्षेत्रात निकम परिवाराची उल्लेखनीय कामगिरी आहे. बॅरिस्टर निकम यांच्यापासून चालत आलेल्या या सेवाभावी कार्याचा वारसा या परिवाराची आजची पिढीही जोपासत आहे. याबाबत अभिमान वाटत असल्याचे चंद्रहास गुजराथी यांनी सांगितले. तसेच प्रा.डॉ.शालिनी सोनवणे, डॉ. रवींद्र निकम, जगन पाटील, मीनाक्षी चव्हाण, जिल्हा मार्केटींग सोसायटीचे संचालक रमेश पाटील यांनी मनोगत व्यक्त केले.
महिलांना सहकार क्षेत्रात मोठी संधी
अनेक क्षेत्रात काम करीत असताना मिळालेल्या अनेक संधीचे सोने केले. मोठ्या शहरात उच्च शिक्षण घेऊनही माचल्यासाऱख्या छोट्या गावात अनेक वर्ष संसार केला. कुटुंबाने शेतीशी निष्ठा राखून ग्रामविकासाला हातभार लावला. महिलांना सहकार क्षेत्रात मोठी संधी आहे. या पुरस्कार व सत्कारामुळे आणखी काम करण्याची प्रेरणा मिळाली, असे मत सत्कारमूर्ती शैलजादेवी निकम यांनी व्यक्त केले.
विविध संस्थातर्फे सन्मान
निकम यांच्या विविध क्षेत्रातील योगदानानिमित्त त्यांचा सत्कार माचलेसह अनेक ठिकाणच्या विविध सेवाभावी संस्था, संघटना, राजकीय, सामाजिक क्षेत्रातील पदाधिकार्यांनी केला. राष्ट्रवादी कॉंग्रेसच्या सहकार सेलच्या जिल्हाध्यक्षपदी निवड झाल्यानिमित्त वाल्मीक पाटील, तसेच वैद्यकीय महाविद्यालयातील वरिष्ठ निवासी त्वचारोग तज्ज्ञ डॉ.स्नेहल लोलगे यांचा वैद्यकीय क्षेत्रातील उल्लेखनीय कामगिरीबद्दल अरुणभाई गुजराथी यांच्या हस्ते सत्कार करण्यात आला. प्रास्ताविक संदिपा वाघ, सूत्रसंचालन अय्याज मोहसीन यांनी केले.
