लातूर (वृत्तसंस्था) बसच्या धडकेत युवकाचा मृत्यू झाल्याची घटना उदगीर शहर पोलिस स्टेशनसमोरील स्टेट बँक ऑफ इंडियासमोर सोमवारी रात्री घडली. या अपघातात एक जण जखमी झाला देखील झाला आहे.
उदगीर शहरातील मध्य भागातून जाणाऱ्या नांदेड-बिदर रोडवर सोमवारी रात्री साडे अकरा वाजेच्या सुमारास शहर पोलिस स्टेशनसमोर असलेल्या स्टेट बँक ऑफ इंडियाच्या समोरील रोडवरून शैलेश संजय पाटील (वय २८ रा. कपाळेनगर, उदगीर) व रितेश राजकुमार कोटलवार हे दोघे चालले होते. त्याचवेळी नांदेडहून-उदगीरकडे येणाऱ्या बस चालकाने बस निष्काळजीपणे चालवून दोघांना जबर धडक दिली.
या अपघातात शैलेश पाटील यांचा जागीच मृत्यू झाला. तर रितेश कोटलवार गंभीर जखमी झाला आहे. याप्रकरणी रितेश कोटलवार यांच्या तक्रारीवरून बसचालक दीपक भीमराव गोरखे यांच्याविरुद्ध विविध कलमान्वये गुन्हा दाखल करण्यात आला आहे.
