सीबीआयच्या पथकाने ‘मविप्र’मध्ये घेतले अनेकांचे जबाब !

जळगाव (प्रतिनिधी) येथील मराठा विद्या प्रसारक सहकारी संस्थेच्या ताबा मिळवण्यासाठी जानेवारी 2018 मध्ये भोईटे गटाकडून अॅड. विजय पाटील यांना पुण्यात बोलवून धमकावल्या प्रकरणी विजय पाटील यांनी निंभोरा पोलीस स्टेशनमध्ये भाजप नेते गिरीश महाजन यांच्याविरोधात कथित गुन्हा दाखल केला होता. याच प्रकरणात शुक्रवारपासून जळगावात दाखल झालेल्या केंद्रीय अन्वेषण विभाग अर्थात सीबीआयच्या पथकाने आज ‘मविप्र’च्या कार्यालयाची पाहणी करत अनेकांचे जबाब नोंदवल्याचे कळते. (Cbi Team In Jalgaon)

सन 2018 मध्ये अ‍ॅड. विजय पाटील यांना पुण्यात बोलवून डांबुन ठेवत धमकावल्या प्रकरणी निंभोरा पोलिस ठाण्यात गुन्हा दाखल करण्यात आला होता. कालांतराने हा गुन्हा केंद्रीय अन्वेषण विभाग अर्थात सीबीआयकडे तपासाला देण्यात आला होता. शुक्रवारी याच गुन्ह्याशी निगडीत चौकशीसाठी जळगावात सीबीआयचे पथक जळगावात दाखल झाले होते. या पथकाने संस्थेच्या कार्यालयाची पाहणी करत अनेकांचे जबाब नोंदवल्याचे वृत्त आहे. मविप्र संस्थेच्या ताबा मिळवण्यासाठी भोईटे विरुद्ध पाटील गटात सुरू असलेल्या वादात बरेच परस्परविरोधी गुन्हे दाखल झाले आहेत.

या प्रकरणात शुक्रवारपासून सीबीआयचे एक पथक जळगावात तपासासाठी आले आहे. हे पथक शनिवारी सकाळी 10.30 वाजता संस्थेच्या कार्यालयात आले होते. त्यांनी कार्यालयाची पाहणी केली, हाणामारीच्या घटनांची चौकशी केली. तत्कालीन संचालक गोकुळ पिंताबर पाटील, परमानंद साठे, विरेंद्र भोईटे, महेंद्र भोईटे, शिवाजी भोईटे, जयवंतराव येवले, जयवंतराव देशमुख आदींचे जबाब घेतले. यावेळी नीलेश भोईटे उपस्थित होते आणि त्यांचीच या वृत्ताला दुजोरा दिला आहे.

फिर्यादी विजय पाटील यांनी या गुन्ह्यात मंत्री गिरीष महाजन यांचाही सहभाग असल्याचे अनेकवेळा माध्यमांना सांगीतले होते. महाजन यांच्या सांगण्याप्रमाणेच नीलेश भोईटेसह भोईटे गटाने आपल्याला डांबले, धमक्या दिल्या, मारहाण केली, असा आरोप पाटील यांनी काही पत्रकार परिषदांमध्ये केला होता. दरम्यान, सीबीआयचे पथक आणखी काही जणांचे जबाब नोंदविणार असल्याचे कळते.

तीन वर्षांपूर्वी पुण्यात घडलेल्या या घटनेचा निंभोरा इथे गुन्हा दाखल करण्यात आला होता. यानंतर देवेंद्र फडणवीसांनी अॅड. प्रवीण चव्हाण यांच्याशी संबंधित पेनड्राइव्ह बॉम्ब सभागृहात फोडला होता. ज्यामध्ये गिरीश महाजन विरुद्ध केसेस कशा दाखल केल्या?, महाजनांना कसं फसवलं?, अगदी तत्कालीन विरोधीपक्षनेते देवेंद्र फडणवीसांना कसं फसवायचं आहे? ह्या सर्व षडयंत्राचं चित्रीकरण पेनड्राइव्हमध्ये होते. या सर्व प्रकरणाची सीबीआय चौकशी व्हावी, अशी मागणी देवेंद्र फडणीवासांनी विधानसभेत केली होती. सरकार बदलल्यावर हे प्रकरण हे सीबीआयकडे गेले होते. त्या अनुषंगाने सीबीआयचे पथक जळगावात आले असल्याचे कळते.