नाशिक (प्रतिनिधी) महात्मा फुले विकास महामंडळाने मंजूर केलेल्या कर्जाचा धनादेश लाभार्थ्यांच्या खात्यात जमा करण्यासाठी तीन हजारांची लाच घेताना कनिष्ठ लिपिक छाया विनायक पवार यांना यांना अटक करण्यात आली. सामाजिक न्यायभवन येथील कार्यालयात लाचलुचपत प्रतिबंधक विभागाच्या पथकाने ही कारवाई केली.
पवार या नासर्डी पूल परिसरातील महात्मा फुले विकास महामंडळात कनिष्ठ लिपीक पदावर कार्यरत आहे. तक्रारदार यांनी त्यांच्या मुलाचे नावे महात्मा फुले मागासवर्ग विकास महामंडळाकडे व्यावसायिक कर्जासाठी ५ ऑक्टोबर रोजी अर्ज केला होता. त्यानुसार मुलास दोन लाख १६ हजाराचे कर्ज मंजूर करण्यात आले होते. मात्र रक्कम न मिळाल्याने तक्रारदारने संशयित महिलेची भेट घेतली असताना तिने कर्जाच्या रक्कमेचा धनादेश मुलाच्या बँक खात्यात जमा करण्याच्या मोबदल्यात तीन हजार रूपयांच्या लाचेची मागणी केली होती. त्यात तडजोडी होवून हा व्यवहार दोन हजार रूपयांवर निश्चित करण्यात आला होता.
मात्र, याबाबत तक्रारदाराने एसीबीत धाव घेतली. एसीबीच्या पथकाने मंगळवारी (दि.१२) सापळा लावून संशयित महिलेस दोन हजाराची लाच स्वीकारतांना रंगेहात पकडले. ही कारवाई अधीक्षक शर्मिष्ठा घारगे-वालावलकर, अप्पर अधिक्षक माधव रेड्डी व उपअधिक्षक नरेंद्र पवार यांच्या मार्गदर्शनाखाली उपअधिक्षक विश्वजीत जाधव हवालदार प्रणय इंगळे, ज्योती शार्दूल, अंमलदार अनिल गांगुर्डे, चालक परशूराम जाधव आदींच्या पथकाने केली.
