नंदुरबार (प्रतिनिधी) तीन दिवसानं लग्न, मित्र, नातेवाईकांना मोठ्या आनंदाने पत्रिका वाटल्या, घरात पाहुणे आणि लग्नाची लगबग सुरु असतानाच अघटीत घडलं आणि लग्नघरात शोककळ पसरली. ज्या घरात नवरदेवासह कुटुंबियांच्या आनंदाला उधाण आले होते, त्याच घरावर आता शोककळा पसरली आहे. तळोदा तालुक्यातील बोरद येथील चेतन (किसन) कोळी (वय २२) या भावी नवरदेवाचा गुरुवारी दुपारी दुर्दैवी मृत्यू झाला.
बोरद येथील चेतन कोळी याचा विवाह २९ मे रोजी शिंदखेडा येथील एका मुलीसोबत विवाह निश्चित झाला होता. चेतन नोकरीनिमित्त अहमदाबाद येथे वास्तव्यास होता. लग्नानिमित्त काही दिवसांच्या रजेवर तो घरी येथे आला होता. लग्नाचा उत्साहामुळे तो व घरचे सर्व खूष होते. अगदी चेतन स्वतः लग्नाच्या पत्रिका गावात वाटप करून प्रत्येकास आग्रहाने आमंत्रित करीत होता.
मात्र गुरुवारी दुपारी ३ वाजता तो बाथरूममध्ये काही तरी काम करत असताना अचानक त्याची प्रकृती बिघडली व तो त्याच ठिकाणी खाली कोसळला. त्याचा आवाज झाल्याने जवळ असलेल्यांनी जाऊन बघितले असता तो अत्यवस्थ अवस्थेत आढळून आला. कुटुंबीय व मित्रांनी लगेच शहादा येथे खाजगी रुग्णालयात घेऊन जाण्याचे निश्चित झाले. परंतु शहाद्या पोहोचण्याआधी रस्त्यातच चेतनचा मृत्यू झाला. ज्या घरातून लग्नाचं वऱ्हाड निघणार होते, त्याच घरातून अंत्ययात्रा निघाल्याने सर्वत्र हळहळ व्यक्त होत आहे.
दरम्यान, दि. २५ मे रोजी बाथरूममध्ये विद्युत बोर्डमध्ये बिघाड झाल्याने चेतन ते दुरुस्ती करत असताना त्याला अचानक विजेचा धक्का लागल्याने त्याचा दुर्दैवी मृत्यू झाल्याची प्राथमिक माहिती समोर येत आहे. या घटनेची माहिती मिळाल्यानंतर गावावर दुःखाचा डोंगर कोसळला. चेतन हा तीन बहिणींचा एकच भाऊ असून आईचा एकमेव आधार होता.
