चोपडा (प्रतिनिधी) २६ तोळे सोन्याचे दागिने असलेली बॅग चोरट्यांनी हातोहात लांबवल्याची घटना तालुक्यातील अकुलखेडा व चहार्डी फाट्या जवळील सौभाग्य लॉन येथे सुरू असलेल्या साखरपुड्याच्या कार्यक्रमात घडली. बॅगमध्ये तब्बल ११ लाख ७१ हजार किंमतीचे सोने चांदीचे दागिने होते. ही घटना दि १९ रोजी दुपारी १२ ते ३ वाजेच्या दरम्यान घडली. पोलिसांनी संशयितांना ताब्यात घेत कसून चौकशी सुरू केली आहे.
नेमकं काय घडलं !
चुंचाळे, ता. चोपडा येथील देवेंद्र नारायण चौधरी (५३) यांच्या मुलीचा सौभाग्य लॉन्स येथे सोमवारी सकाळी साखरपुडा होता. त्याठिकाणी देवेंद्र चौधरी यांच्या मुलीचे व पुतणीचे ११ लाख ७१ हजार किंमतीचे सोन्या चांदीच्या दागिने ठेवलेली पर्स आजीकडे ठेवली होती. ती पर्स घेऊन आजी सोफ्यावर बसलेल्या असताना पर्स सोफ्यावर बाजूला ठेवली. तेवढ्यात एका अज्ञात चोरट्याने ती पर्स लंपास करत पोबारा केला.
बॅगमध्ये लाखोंचे दागिने !
बॅगमध्ये दोन लाख रुपये किमतीचे सात तोळ्याचे नेकलेस, चार लाख ५० हजार रुपये किमतीचा नऊ तोळे सोन्याचा नेकलेस, चार लाख पन्नास हजार रुपये किमतीच्या नऊ तोळे वजनाच्या सहा बांगड्या यासह अनेक वस्तू होत्या. या प्रकरणी देवेंद्र नारायण चौधरी यांच्या फिर्यादीवरून चोपडा शहर पोलीस ठाण्यात अज्ञात व्यक्ती विरोधात गुन्हा दाखल करण्यात आला आहे. पुढील तपास सपोनि संतोष चव्हाण हे करीत आहे. दरम्यान, पोलिसांनी फोटोग्राफर व इतर संशयितांना ताब्यात घेऊन कसून चौकशी सुरू केली आहे. याबाबत चौपडा शहर पोलिसांत गुन्हा दाखल झाला आहे.
शहरात सामान्य नागरिकांनामध्ये घबराट !
चोपडा शहरात मागील काही दिवसापासून रोजच छोट्या मोठ्या चोऱ्या सुरू आहेत. मेन रोड ,कॉलनी परिसरात अश्या विविध ठिकाणी चोरी होत आहे. त्यामुळे सामान्य नागरिक मात्र चांगलेच भयभीत झाले आहेत. याबाबत वरिष्ठांनी लक्ष देऊन चोरीचा छडा लावायला हवा, असेही जनमानसात बोलले जात आहे.
पोलीस वाहन व कर्मचारी जास्तीचे दयावेत !
चोपडा शहर पोलीस स्टेशनची हद्द मोठी येऊन जाते. मात्र, कर्मचारी त्या हिशोबाने फारच कमी असल्याने चोरीचे प्रमाण वाढले आहे. तसेच इतक्या मोठी हद्दीत एकच गाडी पेट्रोलिंग करत असते. त्यामुळे पोलिसांना चकवा देऊन चोरटे रोजच चोरी करत आहेत. त्यामुळे वरिष्ठांनी जातीने लक्ष देऊन जास्तीचे कर्मचारी व नवीन गाडी दयावी, अशीही मागणी होत आहे.
पोलीस निरीक्षक मगलसिंग यांची आठवण !
चोपडा शहरात अमळनेर तालुक्यातील रहिवाशी मंगलसिंग नावाचे पोलीस निरीक्षक होते. हे स्वतः पेट्रोलिंग करायचे. कुठेही गाडीतून उतरून अगदी मोटार सायकलवर ते कोणत्याही गल्ली बोळात जात असत. त्यासोबतच रोज वेगवेगळे पेहराव करत असल्याने रात्रीच्या वेळेस पोलीस निरीक्षक मगलसिंग आहेत, हे चोपडावासीय सुध्दा ओळखत नसत. यामुळेच त्यांचा दरारा वेगळाच होता.
