पाचोरा (प्रतिनिधी) डोक्यावर असलेले कर्ज फेडण्यासाठी घरात एकटीच राहत असलेलया मांजाबाई दगडु भोई (वय ८०, रा. पिंपळगाव हरेश्वर ता. पाचोरा) या वृद्धेचा खून करुन तीचा मृतदेह गोणपाटमध्ये बांधून ठेवला होता. ही घटना बुधवारी सायंकाळच्या सुमारास उघडकीस आली. दरम्यान, कर्ज फेडण्यासाठी आजी पैसे देत नसल्याने विशाल प्रभाकर भोई, – (वय २२) या नातवानेच आजीची हत्या केल्याची कबुली दिली असून अवघ्या चार तासाच एलसीबीच्या पथकाने त्याच्या मुसक्या आवळल्या.
जिवे ठार मारुन गोणपाटमध्ये बांधून ठेवले !
पाचोरा तालुक्यातील पिंपळगाव हरेश्वर येथील रहिवासी असलेल्या मांजाबाई दगडु भोई या घरात एकट्याच राहत होत्या. बुधवारी दि. १५ मे रोजी सायंकाळी वृद्धेला कोणीतरी अज्ञात इसमाने तिचे घरात तिला जिवे ठार मारुन गोणपाटमध्ये बांधून ठेवल्याचा प्रकार उघडकीस आला. घटनेची माहिती मिळताच पिंपळगाव पोलीस स्टेशनचे सहाय्यक पोलीस निरीक्षकांनी पथकासोबत घटनास्थळी धाव घेतली. यावेळी त्यांनी तपासचक्रे फिरवले असता, त्यांना वृद्धेचा खून तीचाच नातू विशाल याने केल्याची माहिती मिळाली. पथकाने विशाल भोई याची माहिती घेतली असता तो पाचोरा येथे ग्रामीण रुग्णालय पाचोरा येथे गेला असल्याचे समजले.
पैसे न दिल्याने आवळला गळा
ताब्यात घेतलेल्या विशालची कसून चौकशी केली असता, त्याने माझ्यावर कर्ज झाले असल्याने कर्ज फेडण्यासाठी मी आजीकडे पैशांची मागणी केली होती. त्यावर आजीने मला नकार दिल्याने मी आजी मंजाबाई हिचा गळा दाबुन तिला जिवेठार मारल्याची कबुली पोलिसांना दिली.
