भडगाव (प्रतिनिधी) तालुक्यातील एका गावातील बेपत्ता अल्पवयीन मुलीचा १९ वर्षीय नराधमाने निर्घृण खून केल्याचे पोलीस तपासात उघड झाले आहे. जळगाव एलसीबीने गुन्ह्याची उकल केली असून आरोपीला तपासकमी भडगाव पोलिसांच्या ताब्यात दिले आहे. स्वप्नील उर्फ सोन्या विनोद पाटील असे अटक करण्यात आलेल्या संशयित तरुणाचे नाव आहे.
नेमकं काय आहे प्रकरण !
भडगाव तालुक्यातील एका गावातील अल्पवयीन मुलगी ३० जून रोजी बेपत्ता झाल्याची तक्रार पोलिसांत दाखल करण्यात आली होती. बेपत्ता अल्पवयीन मुलीचा पोलिस प्रशासनाकडून शोध सुरू असतानाच १ ऑगस्टला या अल्पवयीन मुलीचा मृतदेह घरापासून जवळच असलेल्या मोकळ्या जागेत कडबा कुट्टीखाली आढळून आला होता. नरबळी की अत्याचाराच्या प्रयत्नातून घडलेला प्रकार याबाबत गावात विविध चर्चा सुरु होत्या. तसेच या घटनेबाबत खुनाचा गुन्हा दाखल करा व सशयित आरोपींचा शोध घेऊन आरोपींना तत्काळ अटक करा, बालहत्येला न्याय द्या, या मागणीसाठी गोंडगाव येथील बालिकेच्या आईसह २५० ते ३०० ग्रामस्थांनी आक्रोश करत बुधवारी ठिय्या आंदोलन केले होते.
खाक्या दाखविताच पोपटासारखा बोलू लागला !
संशयित स्वप्नील उर्फ सोन्याला ताब्यात घेतल्यानंतर तो उडवाउडवीची उत्तरं देत होता. घटनेच्या दिवशी आपण मित्रांसोबत स्वतःचा वाढदिवस साजरा करत असल्याचे सांगत होता. परंतू आरोपीने एक महिन्यापूर्वीही पिडीतेची टिंगलटवाळी केली असल्याची माहिती असल्यामुळे पोलिसांनी त्याला वेगवेगळ्या पद्धतीने विचारपूस केली. अगदी ज्या मित्रांसोबत घटनेची दिवशी वाढदिवस साजरा करत असल्याचेही सांगत होता, त्यांना देखील बोलते करण्यात आले. सोन्याच्या मित्रांनी पोलिसांना संगीतले की आम्ही त्याचा वाढदिवस २३ जुलै रोजी केला होता, ३० जुलैला नाही. आपले पितळ उघड होत असल्याचे दिसूनही सोन्या पोलिसांना मात्र उलट-सुलट उत्तरे देतच होता. शेवटी पोलिसी खाक्या दाखवातच तो पोपटासारखा बोलू लागला.
गावात बदनामी होण्याच्या भीतीने केला निर्घृण खून !
२९ जुलै रोजी पिडीत मुलगी दुपारी घरी एकटी असतांना सोन्याने पिडीतेला गुरांच्या गोठ्यात बोलावून घेतले. त्यानंतर तिच्यावर अत्याचार करण्याचा प्रयत्न केला. भेदरलेल्या पिडीतेने आरडाओरडा सुरु केला. त्यामुळे घाबरलेल्या सोन्याचे तिचे तोंड दाबून डोक्यात दगड घातला. यामुळे पिडीत बालिका जागेवरच कोसळली. यानंतर सोन्याने गोठ्यातच असलेल्या कडब्याच्या कुट्टीत पिडीतेला दाबून टाकले.
मृतदेहाची दुसरीकडे विल्हेवाट लावणे शक्य झाले नाही !
पिडीत बालिकेला कडब्याच्या कुट्टीत दाबून ठेऊन नंतर मृतदेहाची विल्हेवाट लावण्याची सोन्याची योजना होती. परंतू गावातून अचानक आठ वर्षाची बालिका गायब झाल्यामुळे ग्रामस्थांमध्ये मोठी खळबळ उडाली होती. त्यामुळे दिवसभर तसेच रात्री उशिरा देखील गावातील चौका चौकात ग्रामस्थ चर्चा करत होते. त्यामुळे सोन्याचा मृतदेह दुसरीकडे नेत विल्हेवाट लावणे शक्य झाले नाही. कडब्याच्या कुट्टीतून दुर्गंधी येवू लागल्याने हा प्रकार १ ऑगस्ट रोजी उघडकीस आला.
मृतदेह होता कुजलेला !
भडगाव पोलीस ठाण्याचे पोलीस कर्मचारी आणि स्थानिक गुन्हे शाखेचे पोलीस पथक घटनास्थळी दाखल झाले. पिडीतेचा मृतदेह दोन दिवस कुट्टीत असल्यामुळे कुजलेला होता. सोन्या उर्फ स्वप्निल पाटील याला ताब्यात घेतले. त्याची कसुन चौकशी केली असता त्याने गुन्ह्याची कबुली दिली. त्यानुसार त्याच्यावर भडगाव पोलीस ठाण्यात गुन्हा दाखल करण्यात आला. दरम्यान, या गुन्ह्यात ३०२ अर्थात खुनाचे कलम वाढविण्यात आले असून शवविच्छेदन अहवाल आल्यानंतर पुढील कलम वाढविण्यात येतील, अशी माहिती पोलीस अधीक्षक एम. राजकुमार यांनी दिली आहे.
यांनी केली गुन्ह्याची उकल !
पोलीस अधीक्षक एम. राजकुमार, अप्पर पोलिस अधीक्षक रमेश चोपडे, सहाय्यक पोलिस अधीक्षक अभयसिंह देशमुख यांच्या मार्गदर्शनाखाली स्थानिक गुन्हे शाखेचे पो.नि. किसनराव नजनपाटील यांच्या पथकातील स.पो.नि. निलेश राजपूत, पोउपनिरी गणेश वाघमारे, गणेश चोबे, हे.कॉ. विजयसिंग पाटील, सुधाकर अंभोरे, विजय पाटील, लक्ष्मण पाटील, प्रितम पाटील, महेश महाजन, अनिल जाधव, अकरम शेख, किशोर राठोड, ईश्वर पाटील, किरण चौधरी, हेमंत पाटील, हरिष परदेशी, महेश पाटील, रमेश जाधव, भारत पाटील, प्रमोद ठाकूर, दर्शन ढाकणे आदींनी या गुन्ह्याचा उलगडा केला.
बालिकेवर शोकाकूल वातावरणात अंतिमसंस्कार !
बुधवारी सायंकाळी सहा वाजण्याच्या सुमारास मृत बालिकेची पोलिस बंदोबस्तात अंत्ययात्रा काढण्यात आली. या अंत्ययात्रेत शेकडो ग्रामस्थ सामील झाले. यावेळी अप्पर पोलिस अधीक्षक रमेश चोपडे, सहाय्यक पोलिस अधीक्षक अभयसिंह देशमुख, स्थानिक गुन्हे शाखेचे पो. नि. किसनराव पाटील, पो.नि. राहुल खताळ, सहाय्यक पोलिस निरीक्षक तुषार देवरे, पोलिस निरीक्षक राजेंद्र पाटील, सहाय्यक पोलिस निरीक्षक चंद्रसेन पालकर, पोलिस उपनिरीक्षक शेखर डोमाळे तसेच भडगाव, पाचोरा पोलिस ठाण्यातील पोलिस कर्मचाऱ्यासह चाळीसगाव उपविभागातील ३ अधिकाऱ्यांसह २५ कर्मचारी यांनी चोख बंदोबस्त ठेवला.
आरोपीला अटक होत नाही, तोपर्यंत मुलीचा मृतदेह ताब्यात न घेण्याची भूमिका !
अल्पवयीन मुलीचा मृतदेह उत्तरीय तपासणीसाठी जळगाव येथे पाठवण्यात आला होता. दरम्यान, जोपर्यंत आरोपीस अटक होत नाही, तोपर्यंत मुलीचा मृतदेह ताब्यात घेणार नाहीत, अशी भूमिका मुलीच्या कुटुंबीयांसह नातेवाईकांनी घेतली होती. यावेळी उपस्थित अधिकाऱ्यांनी त्यांची समज काढल्यानंतर मुलीवर रात्री ७.३० वाजेच्या सुमारास शोकाकूल वातावरणात अंत्यसंस्कार करण्यात आले. यावेळी पोलिस निरीक्षक राजेंद्र पाटील, पो.नि. राहुल खताळ यांच्यासह पोलीस अधिकारी, कर्मचाऱ्यांचा चोख बंदोबस्त होता. तर भडगाव पोलीस ठाण्यात ठाण मांडून अप्पर पोलिस अधीक्षक रमेश चोपडे, सहाय्यक पोलिस अधीक्षक अभयसिंह देशमुख, स्थानिक गुन्हे शाखेचे पो. नि. किसनराव पाटील या तपासाला गती दिली होती.
तात्काळ चौकशी करण्याचे पालकमंत्र्यांचे निर्देश !
बालिका मृत्यूप्रकरणात पालकमंत्री गुलाबराव पाटील यांनी तात्काळ चौकशी करून आरोपींना अटक करण्याचे निर्देश अपर पोलिस अधिक्षक रमेश चोपडे यांना दिले आहेत. या घटनेची माहिती कळताच पालकमंत्री गुलाबराव पाटील यांनी चोपडे यांच्याशी दूरध्वनीवरून चर्चा केली.
