पुणे (वृत्तसंस्था) पुण्यातील कोंढवा (Kondhwa) परिसरात एका पतीने इमारतीच्या सुपरवायझर सोबत भांडण न केल्यामुळे झालेल्या वादातून पत्नीला इमारतीच्या चौथ्या मजल्यावरून खाली ढकलून दिले. पतीने हे धक्कादायक कृत्य केल्याप्रकरणी पुणे पोलिसांनी (Pune Police) नितीन दसरथ दहिरे (वय ३२) याला अटक केली आहे.
याप्रकरणी कोंढवा पोलीस ठाण्यात २५ वर्षीय पत्नीने तक्रार दिली आहे. पोलिसांनी दिलेल्या माहितीनुसार, कोंढवा येथील एका निर्माणाधीन इमारतीत फिर्यादी या पतीसोबत राहतात. याठिकाणी लाईट फिटिंग चे काम सुरू आहे. काही दिवसांपूर्वी नितीन दहिरे याचे लाईट फिटिंग करण्यासाठी आलेल्या सुपरवायझर सोबत भांडण झाले होते. त्यावेळी पत्नीने आपली बाजू घेत सुपरवायझर सोबत भांडण केले नसल्याचा राग त्याच्या मनात होता. याच कारणावरून त्यांच्यात शनिवारीही भांडण झाले. त्यानंतर नितीन दहिरे याने रागाच्या भरात फिर्यादीला लाथाबुक्क्यांनी मारहाण केली. त्यानंतर चौथ्या मजल्यावरून लिफ्टसाठी सोडलेल्या मोकळ्या जागेतून त्यांना खाली ढकलून दिले. फिर्यादी या घटनेत गंभीर जखमी झाले आहेत. अधिक तपास कोंढवा पोलीस करत आहेत.
