जळगाव (प्रतिनिधी) तालुक्यातील शिरसोली येथील एक तरुणाचा धरणात बुडून मृत्यू झाल्याची दुर्दैवी घटना शुक्रवारी १५ सप्टेंबर रोजी दुपारी घडली. सोनू उर्फ सोपान संजय महाजन ( वय १९, रा. शिरसोली ता. जळगाव) असे मयत तरुणाचे नाव आहे.
शुक्रवारी १५ सप्टेंबर रोजी दोन वाजेच्या सुमारास शिरसोलीतील काही तरुण शामा फायर कंपनीमागील चारदरी धरणाजवळ गेले होते. यावेळी धरणाच्या काठावर काही वेळ बसल्यानंतर सोपान महाजन हा पोहण्यासाठी धरणाच्या पाण्यात उतरला. धरणात चिखल असल्यामुळे उडी मारल्यानंतर तो फसला त्यामुळे त्याचा पाण्यात गुदमरून मृत्यू झाला.
यामुळे घाबरलेल्या दुसऱ्या मुलाने आरडाओरड केली. गावातील काही मित्रमंडळी व ग्रामस्थांशी संपर्क साधून घटनेबाबत माहिती दिल्यानंतर ग्रामस्थ व मित्रांनी घटनास्थळी धाव घेतली सोपानला धरणाबाहेर काढून शासकीय वैद्यकीय महाविद्यालय व रुग्णालय, जळगाव येथे उपचारासाठी दाखल करण्यात आले असता तेथे वैद्यकीय अधिकाऱ्यांनी मयत घोषित केले. सोपानचा मृतदेह बघताच कुटुंबीयांसह मित्रांनी देखील एकच आक्रोश केला.
