जळगाव (प्रतिनिधी) गुंतवणुकीतून अधिकच्या नफ्याचे आमिष दाखवून एका शेतकऱ्याची तब्बल पाच लाख ६५ हजार रुपयांत फसवणूक झाल्याचा प्रकार समोर आला आहे. याप्रकरणी जळगाव सायबर पोलिस ठाण्यात दोन महिलांविरुद्ध गुन्हा दाखल करण्यात आला आहे.
या संदर्भात अधिक असे की, एप्रिल २०२३ मध्ये लक्ष्मी व संजना नामक दोन महिलांनी एक व्हॉट्सॲप ग्रुप तयार केला व त्यात शेतकरी कांचनकुमार सुधाकर पिंपळे (४७, रा. भालोद, ता. यावल) यांना अॅड केले. त्यानंतर दोन वेगवेगळ्या क्रमांकाद्वारे एक गुंतवणूक योजना सांगून पिंपळे यांचा विश्वास संपादन केला.
तसेच योजनेत गुंतवणूक केल्यास अधिकचा नफा देण्याचे आमिष त्यांना दाखवण्यात आले. यानंतर ग्रुपमधील लक्ष्मी व संजना नामक दोन महिलांनी पिंपळे यांच्या बँक खात्यातून वेळोवेळी एकूण सहा लाख ३० हजार रुपये दोन वेगवेगळ्या बँक खात्यांवर स्वीकारले. परंतू सांगितल्याप्रमाणे पिंपळे यांना नफ्याची रक्कम दिलीच नाही. त्यांनी सहा लाख ३० हजार रुपये दिले असताना त्यांना फक्त ६५ हजार रुपये परत देण्यात आले.
अनेक दिवसांनंतरही उर्वरित नफा व मुद्दलही मिळत नसल्यामुळे आपली फसवणूक झाल्याची खात्री झाल्यानंतर पिंपळे यांनी सायबर पोलिसात धाव घेतली. त्यानुसार दोघं महिलांविरुद्ध गुन्हा दाखल करण्यात आला असून पुढील तपास सायबर पोलिस ठाण्याचे पोलिस निरीक्षक बी.डी. जगताप हे करीत आहेत.
