जळगाव (प्रतिनिधी) शतपावली करीत असलेल्या महिलेच्या गळ्यातून रस्त्याने पायी येत असलेल्या चोरट्याने ६ ग्रॅम वजनाचे मंगळसूत्र जबरीने ओढून नेत चोरटा पसार झाला. ही घटना दि. ३ रोजी रात्री साडेनऊ वाजेच्या सुमारास शहरातील का. ऊ. कोल्हे शाळेच्या मागील गेटजवळ घडली. याप्रकरणी शनिपेठ पोलीस ठाण्यात गुन्हा दाखल करण्यात आला आहे.
शहरातील जूनाखेडी रोड परिसरातील स्वप्नशिल अपार्टमेंटमध्ये राहणारे मनिषा विनोद बारी (वय ४६) हे वास्तव्यास आहे. दि. ३ रोजी रात्री साडेनऊ वाजेच्या सुमारास जेवण झाल्यानंतर मनिषा बारी या त्यांच्या शेजारी राहणाऱ्या उषा पुंडलिक देवरे यांच्यासोबत शतपावली करीत होत्या. शतपावली करीत
असतांना त्या काशीबाई उखाजी कोल्हे शाळेच्या मागील गेटजवळून जात असतांना त्याठिकाणी तोंडावर रुमाल बांधलेला आणि डोक्यात काळी टोपी घातलेला एक इसम त्यांच्याजवळ आला. त्याने रस्त्याने पायी जात असलेल्या मनिषा बारी यांच्या गळ्यातून ६ ग्रॅम वजनाचे मंगळसूत्र जबरीने चोरुन नेले. दरम्यान, बारी यांनी आरडाओरड केला, मात्र तो पर्यंत चोरटा अंधाराचा फायदा घेवून शाळेच्या गेटमधून आत प्रवेश करीत तेथून पसार झाला. याप्रकरणी मनिषा बारी यांनी दिलेल्या तक्रारीनुसार शनिपेठ पोलिस ठाण्यात गुन्हा दाखल करण्यात आला आहे. तपास पोलीस निरीक्षक रंगनाथ धारबळे करीत आहे.
