जालना (वृत्तसंस्था) तालुक्यातील एका गावात मुलानेच जन्मदात्या वृद्ध आईवर अत्याचार केल्याची संतापजनक घटना बुधवारी उघडकीस आली आहे. या प्रकरणी पिडीत आईच्या तक्रारीनंतर नराधम मुलाला पोलिसांनी अटक केली आहे. नात्याला काळिमा फासणाऱ्या या घटनेने जिल्हा हादरुन गेला आहे.
जालना तालुक्यातील एक 55 वर्षीय वृद्ध महिला आपल्या अपंग पतीसोबत राहते. अपंग असल्यामुळे पती भिक्षा मागून आपल्या कुटुंबाचा उदरनिर्वाह चालवतात. त्यांना एक 27 वर्षीय मुलगा आहे. मुलगा हा बाहेर जिल्ह्यात एक शेतकऱ्याकडे सालदार म्हणून काम करतो. मात्र बऱ्याच दिवसांनंतर १ मे रोजी तो घरी आला होता. रात्री जेवण झाल्यानंतर वृद्ध व नराधम मुलगा घराच्या अंगणात झोपले होते. त्यादिवशी त्याचे वडील घरी नव्हते.
रात्री बारा वाजेच्या सुमारास मुलाने पायाला काहीतरी चावल्याचे सांगून आईला उठवलं आणि घरात नेले. त्यानंतर त्या मुलाने आईवर अत्याचार केला. आईने विरोध केल्यावर त्याने आईला लाकडाच्या दांडक्याने मारहाण केली. त्यानंतर त्याने रात्रीतून तीन ते चार वेळा आईवर अत्याचार केला. यानंतर दुसऱ्या दिवशी सकाळी नराधम मुलगा नाशिक जिल्ह्यातील सिन्नरला निघून गेला. भयभीत झालेल्या या वृद्धेने घडलेला संपूर्ण प्रकार आपल्या शेवगा येथील आपल्या बहिणीला सांगितला. नंतर बहिणीने महिलेला उपचारासाठी रुग्णालयात दाखल केले. याप्रकरणी पीडित महिलेच्या तक्रारीवरून मुलाविरुद्ध गुन्हा दाखल करण्यात आला आहे. गुन्हा दाखल होताच, मौजपुरी पोलिसांच्या पथकाने बुधवारी सकाळी संशयिताला ताब्यात घेतल्याची माहिती योगेश धांडे यांनी दिली.
