बंगळुरू (वृत्तसंस्था) मंदिरांच्या दानपेटीत वापरलेले कंडोम (Condom) टाकणाऱ्या एका व्यक्तीला कर्नाटक पोलिसांनी (Karnataka Police)अटक केली आहे. देवदास देसाई असं आरोपीचं नाव आहे. येशूचा संदेश देण्यासाठी आपण हे करत असून त्याचा आपल्याला कोणताही पश्चाताप नसल्याचं आरोपी देवदास देसाई याने चौकशीदरम्यान पोलिसांना सांगितलं. जवळपास वर्षभरापासून पोलीस त्याचा शोध घेत होते.
प्रत्येक वेळी चकवा देऊन निघून जायचा
याबाबत समोर आलेल्या वृत्तानुसार ६२ वर्षीय आरोपी देवदास देसाई हा मंगळुरूमधील अनेक मंदिरांमध्ये जाऊन असे कृत्य करून आला आहे. बऱ्याच काळापासून पोलीस त्याच्या शोधात होते. मात्र तो नेहमीच पोलिसांच्या हाती तुरी देऊन फरार होत असे. गेल्या वर्षी २७ डिसेंबर रोजी कोरज्जाना कट्टे गावातील एका मंदिरातील दान पेटीमध्ये वापरलेला कंडोम टाकल्याची घटना घडली होती. तेव्हापासून पोलीस त्याचा शोध घेत होते. दरम्यान अखेर आता तो पोलिसांच्या जाळ्यात पोहोचला आहे.
अशा प्रकारची घटना घडल्यानंतर पोलिसांनी मंदिर आणि आसपासच्या परिसरातील कॅमेरे तपासले. जेव्हा अधिकाऱ्यांनी सीसीटीव्ही फुटेज तपासले तेव्हा त्यामध्ये आरोपीचा चेहरा दिसून आला. त्या आधारावर पोलिसांनी त्याला अटक केली. चौकशीमध्ये देवदास देसाई याने त्याने अशाप्रकारे अनेक मंदिरांना अपवित्र केल्याचे कबुल केले होते. आरोपीने सांगितले की, त्याने एकूण १८ मंदिरांमध्ये असं विकृत कृत्य केलं आहे. मात्र यापैकी केवळ पाच मंदिरांकडून पोलिसांना तक्रारी मिळाल्या होत्या.
म्हणून दानपेटीत टाकायचा कंडोम
पोलिसांनी दिलेल्या माहितीनुसार, आरोपीने जबाबामध्ये सांगितले की, मंदिरांमध्ये तो यासाठी कंडोम फेकायचा जेणेकरून ती अपवित्र होऊन लोक आपल्या धर्माकडे आकृष्ट व्हावेत, हा त्याचा हेतू होता. केवळ मंदिरच नाही तर मशिदी आणि गुरुद्वारामध्येही त्याने अशाप्रकारे कंडोम फेकले होते. दरम्यान, केलेल्या कृत्याचा आरोपीला कुठलाही पश्चाताप नाही आहे. त्याने सांगितले की, तो केवळ येशूच्या शिकवणीचा प्रसार करत होता. आरोपीने सांगितले की, बायबल सांगते की येशूशिवाय अन्य कुणीही ईश्वर नाही आहे. तसेच अशुद्ध वस्तू ह्या अपवित्र ठिकाणीच टाकाव्यात म्हणून मी कंडोम मंदिरांमध्ये फेकत असे, असेही त्याने सांगितले.
