जळगाव (प्रतिनिधी) शहरातील गोलाणी मार्केटमध्ये रविवारी रात्री सोपान गोविंदा हटकर या तरुणाचा चॉपरने भोसकून खून करण्यात आला होता. जळगाव स्थानिक गुन्हे शाखेचे वरिष्ठ पोलीस निरीक्षक किसनराव नजनपाटील व त्यांच्या पथकाने अवघ्या चार तासात गुन्ह्याचा उलगडा करत चौघं मारेकऱ्यांना अटक केली आहे. ज्ञानेश्वर उर्फ नानू दयाराम लोंढे (रा. कंजरवाडा जळगाव), राहुल भरत भट (रा. खोटे नगर जळगाव), गोविंद उर्फ चेरी शांतीलाल झांबरे (रा. कंजरवाडा जळगाव), करण सुभाष सकट (रा. कोंडवाडा बी. जे. मार्केट) अशी अटक करण्यात आलेल्या चौघा संशयीतांची नावे आहेत.
या संदर्भात अधिक असे की, गोलाणी मार्केटमध्ये 26 मार्चच्या रात्री दहा वाजेच्या सुमारास सोपान हटकर या तरुणाचा खून झाला होता. एलसीबीने तात्काळ तपासचक्र फिरविण्यास सुरुवात केली होती. त्यानुसार पोलीस तपासात समोर आले की, ज्ञानेश्वर उर्फ नानू लोंढे, राहुल भट, गोविंद उर्फ चेरी झांबरे, करण सकट या चौघा मित्रांनी मयत सोपानची मोटार सायकल वापरण्यास घेतली होती. तीच मोटार सायकल परत देण्यासाठी चौघांनी मयत सोपानला गोलाणी मार्केट परिसरात बोलावले होते. परंतू मद्याच्या नशेत आलेल्या सोपानने चौघांना शिवीगाळ करण्यात सुरुवात केली. त्यामुळे संतापाच्या भरात चौघांनी सोपानवर चॉपरने वार केले. यात सोपानचा जागीच मृत्यू झाला. अटकेतील चौघांनी आपला गुन्हा कबुल केला आहे. दरम्यान, मोटार सायकलच्या किरकोळ वादातून खून झाल्याचे धक्कादायक कारण समोर आल्यानंतर सर्वांनाच धक्का बसला आहे.
स्थानिक गुन्हे शाखेचे पो.नि. किसनराव नजनपाटील यांच्या मार्गदर्शनाखाली पोउपनिरी गणेश चोबे, अमोल देवढे, पोहेकॉ. विजयसिंग पाटील, सुधाकर अंभोरे, राजेश मेंढे, संजय हिवरकर, कमलाकर बागुल, अशरफ शेख, संदिप पाटील, महेश महाजन, अकरम शेख, संदिप सावळे, पोना संतोष मायकल, विजय पाटील, प्रविण मांडोळे, दर्शन ढाकणे, पोकॉ. ईश्वर पाटील, लोकेश माळी आदींनी या तपासकामी सहभाग घेतला. या प्रकरणी मयत सोपान हटकर याच्या आईच्या फिर्यादीवरून शहर पोलिस स्टेशनला भाग 5 गु.र.न. 77/23 भा.द.वि. 302, 34 नुसार गुन्हा दाखल करण्यात आला आहे.
