जळगाव (प्रतिनिधी) भुसावळ शहरालगत महामार्गावरील एका आयशर वाहनातून पोलिसांनी ७५ लाख रुपये किमतीचा ५०१ किलो कोरडा गांजा शुक्रवारी जप्त केला होता. या प्रकरणात पसार झालेल्या दोघांना एलसीबीच्या पथकाने चांदवड येथून ताब्यात घेतले आहे. अटकेतील दोघं संशयित आंतरराज्यीय टोळीच्या संपर्कात असल्याची धक्कादायक माहिती समोर आली आहे.
ओडिशातील भुवनेश्वर येथून आलेल्या गांजाची मालेगावसह नाशिक येथे तस्करी होणार असल्याची माहिती पोलिसांना मिळाली. यानंतर कारवाई झाली. पोलिसांच्या कारवाईचा सुगावा लागल्याने पसार झालेल्या दोन संशयितांना पोलिसांनी शनिवारी सकाळी चांदवड येथून ताब्यात घेतले. त्यात एक चालक आहे. हा गांजा ओडिशातून भुसावळमार्गे नाशिक जिल्ह्यात जात होता. या तस्करीत आंतरराज्यीय रॅकेट सहभागी असल्याचा संशय आहे. त्यामुळे या प्रकरणातील मुख्य संशयितांना जेरबंद केल्यानंतरही पोलिसांनी संशयितांची नावे जाहीर केलेली नाहीत.
जळगाव गुन्हे शाखा व बाजारपेठ पोलिसांनी गोपनीय माहितीच्या आधारे चांदवड येथून दोघांना ताब्यात घेतले. दरम्यान, गांजाची वाहतूक होणाऱ्या आयशर वाहनात पोलिसांना डायरी मिळाली. त्याआधारे तांत्रिक विश्लेषणाअंती एलसीबीने चांदवड (जि. नाशिक) येथून वाहन चालकासह अन्य एका संशयिताच्या मुसक्या आवळल्या. आणखी चार साथीदार असून त्यांनाही लवकरच अटक करण्यात येणार असल्याचे स्थानिक गुन्हे शाखेचे वरिष्ठ पोलिस निरीक्षक किसनराव नजन-पाटील यांनी माध्यमांशी बोलतांना सांगितले आहे. तर दुसरीकडे गांजा तस्करीचे आंतरराज्यीय मोठे रॅकेट उघडकीस येण्याची शक्यता वर्तविण्यात येत आहे.
