मुंबई (वृत्तसंस्था) आई- वडिलांपेक्षा मोठं नातं कोणतंच नाही असं म्हणतात आणि याचं ताजं उदाहरण म्हणजे बिग बजेट सिनेमांमध्ये खलनायकाची भूमिका साकारणारा अभिनेता प्रदीप काबरा. ‘सूर्यवंशी’, ‘सिम्बा’, ‘दिल्ली बेली’ यांसारख्या अनेक बॉलिवूड सिनेमांमध्ये काम केलेल्या प्रदीप काबराचे व्हिडीओ पाहिल्यानंतर तुम्हीही त्याला कलियुगातील श्रावणबाळ म्हणाल. ज्यात आईसाठी प्राणाची आहुती देणाऱ्या मुलाची कहाणी आहे.
प्रदीपच्या इन्स्टा अकाऊंटवर त्याचे आईसोबतचे अनेक व्हिडीओ आहेत. १० वर्षांपूर्वी त्याच्या आईला पॅरालिसिसचा अॅटॅक आला. तेव्हापासून प्रदीप आईची सेवा करतोय. आपल्या आईने आधीसारखे सामान्य आयुष्य जगावं, यासाठी तो रात्रंदिवस खपतो. होय, रोज न चुकता आईला पाठीवर बसवून तो तिला समुद्रकिनारी घेऊन जातो. इथे आईकडून थेरपी सेशन करून घेतो, घरी तिचे पाय चेपून देण्यापासून अगदी तिला जेवण भरवण्यापर्यंत सगळं काही करतो.
प्रदीप काबरा याने त्याच्या फिल्मी करिअरची सुरुवात केली ती तामिळ चित्रपटांपासून. तामिळ इंडस्ट्रीत प्रदीपचं मोठं नाव आहे. अनेक बॉलिवूड चित्रपटातही त्याने शानदार भूमिका साकारल्या आहेत. वॉन्टेड, दिलवाले, बागी या चित्रपटात विलनच्या भूमिकेत झळलेला प्रदीप लाईमलाईटपासून दूर राहणं पसंत करतो. चित्रपटाचं शूटींग संपलं की, त्याचा संपूर्ण वेळ तो आईच्या सेवेत घालवतो.
