नवी दिल्ली (वृत्तसंस्था) केंद्रीय मंत्री रामदास आठवले यांनी एक मोठं वक्तव्यं केलं आहे. भारतीय वंशाच्या कमला हॅरिस अमेरिकेच्या उपाध्यक्ष बनू शकतात तर मग इटलीत जन्मलेल्या सोनिया गांधी भारताच्या पंतप्रधान का होऊ शकत नाहीत, असं रामदास आठवले म्हणाले.
रामदास आठवले यांनी शनिवारी मध्य प्रदेशातील इंदूर शहरात पत्रकार परिषद घेतली होती. त्यावेळी त्यांनी म्हटलं की, २००४ च्या सार्वत्रिक निवडणुकीत जेव्हा यूपीएला बहुमत मिळाले, तेव्हा मी सोनिया गांधींना पंतप्रधान करण्याचा प्रस्ताव दिला होता. त्यावेळीही माझे मत होते की त्यांचे परदेशी वंशाचे असणे हा मुद्दा नाही. जर कमला हॅरिस अमेरिकेच्या उपराष्ट्रपती बनू शकतात, तर सोनिया गांधी देखील देशाच्या पंतप्रधान बनू शकतात. सोनिया गांधी भारतीय नागरिक असून त्या देशाचे माजी पंतप्रधान दिवंगत राजीव गांधी यांच्या पत्नी आणि लोकसभेवर निवडून गेलेल्या खासदार आहेत. मग त्या पंतप्रधान नक्की बनू शकतात.
रामदास आठवले यांनी पुढे असंही म्हटलं की, त्यावेळी सोनिया गांधी यांनी पंतप्रधान पद स्वीकारलं नाही. त्यावेळी शरद पवारांना पंतप्रधान बनवायला हवे होते. जे त्यावेळी यूपीएतील वरिष्ठ नेते देखील होते. जर २००४ मध्ये मनमोहन सिंह यांच्या जागी शरद पवारांना पंतप्रधान केले असते तर काँग्रेस पक्षाची स्थिती आज इतकी वाईट झाली नसती.
