सावदा (प्रतिनिधी) – गारबर्डी धरण परिसरात फिरण्यासाठी आलेल्या पर्यटकाच्या इको कारमधून तब्बल १ लाख ५० हजार रुपयांची रोख रक्कम, पाकीट व इतर साहित्य चोरी करणाऱ्या तीन आरोपींना सावदा पोलिसांनी अवघ्या काही दिवसांत अटक करून गुन्ह्याचा उलगडा केला आहे. आरोपींकडून फिर्यादीचे पाकीट, महत्त्वाची कागदपत्रे, रिकामी सॅक व लेडीज पर्स जप्त करण्यात आली असून चोरीच्या रोख रकमेचा शोध सुरू आहे.
दि. १९ जुलै रोजी दुपारी सुमारे २ वाजता भुसावळ येथील शेख समीर शेख दगडू (वय २५) हे मित्र-मैत्रिणींसह गारबडी धरण परिसरात इको कार (एमएच ०२ सीएच ८४९९) ने फिरण्यासाठी आले होते. त्यांनी वाहनाचा हप्ता भरण्यासाठी जमा केलेली १ लाख ५० हजार रुपयांची रोख रक्कम, पाकीट व अन्य साहित्य कारमधील सॅकमध्ये ठेवले होते. धरण परिसरात फिरण्यासाठी गेल्यानंतर कारचे दरवाजे बंद असले तरी डिक्की लॉक नसल्याचा फायदा घेत अज्ञात चोरट्यांनी डिक्की उघडून सॅक, पाकीट व इतर साहित्य लंपास केले.
या प्रकरणी फिर्यादीच्या तक्रारीवरून सावदा पोलीस ठाण्यात दि. २० जुलै रोजी गुन्हा दाखल करण्यात आला. तपासादरम्यान फिर्यादीने दिलेल्या वर्णनावरून पोलिसांनी गुप्त माहितीच्या आधारे गारबडी धरण परिसरात संशयितांचा शोध घेतला. त्यावेळी फिर्यादीने तीन संशयितांना ओळखल्यानंतर पोलिसांनी त्यांना ताब्यात घेतले. अटक करण्यात आलेल्या आरोपींची नावे राजू रज्जाक तडवी (रा. खिरोदा, ता. रावेर), शरीफ वजीर तडवी (रा. चिचाटी, ता. रावेर) आणि अकिल उस्मान तडवी (रा. लोहारा, ता. रावेर) अशी आहेत.
पंचांसमक्ष घेतलेल्या झडतीमध्ये आरोपी शरीफ वजीर तडवी याच्याकडून फिर्यादीचे चोरीस गेलेले पाकीट तसेच आधार कार्ड, पॅन कार्ड, एटीएम कार्ड, आरसी बुक व इतर महत्त्वाची कागदपत्रे जप्त करण्यात आली. त्यानंतर कसून चौकशी केली असता तिन्ही आरोपींनी गुन्ह्याची कबुली दिली. पोलीस कोठडीत आरोपींच्या सांगण्यावरून एक रिकामी सॅक व लेडीज पर्स जप्त करण्यात आली असून, चोरीतील दीड लाख रुपयांच्या रोख रकमेची विल्हेवाट कुठे लावली, याबाबत पोलिसांचा पुढील तपास सुरू आहे. ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि उपविभागीय पोलीस अधिकारी नंदराज पाटील यांच्या मार्गदर्शनाखाली सावदा पोलीस ठाण्याचे सहाय्यक पोलीस निरीक्षक गणेश फड यांच्या नेतृत्वाखालील पथकाने यशस्वीरीत्या पार पाडली.
