जळगाव (प्रतिनिधी) शहरातील वाघुळदे नगरमध्ये ४ नोव्हेंबर रोजी घरफोडी करणाऱ्या तीन संशयित आरोपींना स्थानिक गुन्हे शाखेच्या पथकाने तब्बल ४८ तास सापळा रचून अटक केली आहे.
यासंदर्भात अधिक असे की, ३ ते ४ नोव्हेंबर रोजीच्या दरम्यान शहरातील वाघुळदे नगर प्लॉट नंबर ५७ प्रथमेश अपार्टमेंट जवळील यश संजय ठाकूर यांच्या राहत्या घरात अज्ञात चोरट्यांनी घरफोडी केली होती. या चोरीत चोरट्यांनी एलसीडी टीव्ही, मोबाइल फोन, व ठाकूर यांचे शैक्षणिक कागदपत्रे, मार्केटिंग करता वापरत असलेली बॅग तसेच त्यांच्या आईचे शिरपुर बँक ऑफ इंडिया, गॅस बुक, ओरिएन्टल बँक पास बुक, दानपेटी आदी साहित्य चोरून नेले होते. या संदर्भात शहर पोलीस स्थानकात गुन्हा दाखल करण्यात आला होता.
दरम्यान स्थानिक गुन्हे शाखेचे पोलिस निरीक्षक किरणकुमार बकाले यांना गुप्त माहिती मिळाली होती की, सुरत रेल्वे गेट परिसरात काही तरुण हे मोजमजा करण्यासाठी जळगाव शहरात रात्री घरफोडी करीत आहे. त्या अनुषंगाने श्री. बकाले यांनी पोलिस उपनिरीक्षक रवींद्र गिरासे, सहाय्यक फौजदार विजय पाटील, अशोक महाजन, संजय हिवरकर, राजेश मेढे, रवी नरवाडे, दिनेश बडगुजर, नरेंद्र वारुळे, प्रमोद लाडवंजारी, अविनाश देवरे, महेश महाजन व अशोक पाटील यांचे पथक रवाना केले होते. या पथकाने सुरत रेल्वे गेट परिसरात तब्बल ४८ तास सापळा रचला आणि त्यानंतर तीन संशयितांना ताब्यात घेतले. त्यात विठ्ठल उर्फ सोन्या अशोक लोंढे (वय-२५) पंकज उर्फ गोलू समुद्रे (वय-२२), मिलिंद उर्फ आप्पा विकास व्यहारे (वय-२८,सर्व रा. राज मालती नगर, दूध फेडरेशन, सुरत रेल्वे गेटजवळ, जळगाव) अशा तिघांना अटक केली. या तिघांची सखोल चौकशी केली असता त्यांनी वाघुळदे नगरात घरफोडी केली असल्याचे कबूल केले. तसेच गुन्ह्यातील चोरीला गेलेले सर्व शैक्षणिक कागदपत्रे, एलसीडी टीव्ही, मोबाईल फोन, बँकेचे कागदपत्रे काढून दिले. त्यांना पुढील कारवाईसाठी जळगाव शहर पोलीस स्थानकाच्या ताब्यात देण्यात आले आहे.
