जळगाव (प्रतिनिधी) मध्यरात्रीच्या सुमारास गोलाणी मार्केटमधील मोबाईलचे दुकान फोडून रिपेअरिंगसाठी आलेले ५० हजार १०० रुपयांचे पाच मोबाईल चोरुन नेले. त्यानंतर चोरट्यांनी याच मार्केटमधील कुशल इंटरप्राईजेस व रियल मी सर्व्हिस सेंटर हे दुकान फोडण्याचा प्रयत्न केला. ही घटना सोमवारी पहाटे साडेचार वाजेच्या सुमारास उघडकीस आली. याप्रकरणी शहर पोलीस ठाण्यात गुन्हा दाखल करण्यात आला आहे.
शहरातील मनूमाता नगरात अजयसिंग नागेंद्र राजपूत (वय ३९) हे वास्तव्यास असून त्यांचे गोलाणी मार्केटमध्ये ग्राऊंड फ्लोअरला पुजा मोबाईल नावाने मोबाईल विक्रीचे दुकान आहे. रविवारी रात्री ते दुकानबंद करुन घरी गेले. त्यानंतर सोमवारी पहाटे साडेचार वाजेच्या सुमारास गोलाणी मार्केटमध्ये फिरणाऱ्या ललित गोरखा याने फोन करुन दुकानचे कुलूप तोडल्याची माहिती दिली. त्यानुसार अजयसिंग राजपूत हे तात्काळ दुकानावर गेले. त्यांनी दुकानात जावून पाहणी केली असता, चोरट्याने त्यांच्या दुकानातून रिपेअरिंगसाठी आलेले पाच मोबाईल आणि शंभर रुपये चोरुन नेले.
सीसीटीव्हीसह वायफायची तोडफोड चोरट्याने अजयसिंग राजपूत यांच्या दुकानात चोरी करण्यापुर्वी तेथील सीसीटीव्ही कॅमेरे तोडले. तसेच दुकानात लावलेले वायफाय देखील तोडून नुकसान केले आहे. चोरीची माहिती मिळताच शहर पोलीस ठाण्याचे कर्मचारी घटनास्थळी दाखल झाले. त्यांनी दुकानाच्या परिसरात असलेले सीसीटीव्ही फुटेज ताब्यात घेतल असून त्यांच्याकडून चोरट्याचा शोध घेतला जात आहे.
इतर दोन दुकानाचे कडीकोयंडे तोडले
मोबाईल दुकानात चोरी केल्यानंतर चोरट्याने निलेश जगदिश जगताप (वय ३४, रा. रायसोनीनगर) यांचे कुशल इंटरप्राईजेस व रियल मी सर्व्हिस सेंटर यांचे दुकानाचे कडीकोयंडे तोडून चोरीचा प्रयत्न केल्याचे उघड झाले आहे. याप्रकरणी शहर पोलीस ठाण्यात गुन्हा दाखल करण्यात आला आहे.
