सांगली (वृत्तसंस्था) जिल्ह्यातील जतमध्ये विजापूर-गुहागर राज्यमार्गावरील अमृतवाडी फाट्याजवळ मध्यरात्री स्विफ्ट कारच्या झालेल्या भीषण अपघातात पाच जणांचा जागीच मृत्यू झाला. मयतांमध्ये एकाच कुटुंबातील चौघांचा समावेश आहे.
दत्ता हरीबा चव्हाण (वय ४०), नामदेव पुनाप्पा सावंत (वय ६५),पदमिनी नामदेव सावंत (वय ६०), श्लोक आकाशदिप सावंत (वय ८) आणि मयुरी आकाशदिप सावंत (वय ३८, सर्व रा.जत),अशी मृतांची नावे आहेत. तर वरद सावंत (वय १०) हा गंभीर असून त्याच्यावर जत रुग्णालयात उपचार सुरू आहेत.
विजापूर-गुहागर राज्यमार्गावरील अमृत फाट्याजवळ मध्यरात्री हा अपघात झाला. स्विफ्ट कारने समोरुन येणाऱ्या ट्रकला चुकवण्यासाठी उभ्या असलेल्या डंपरला धडक दिल्याने हा अपघात झाल्याची प्राथमिक माहिती समोर येत आहे. गाणगापूरला देवाचे दर्शन घेऊन विजयपूरमार्गे जतकडे येत असताना हा अपघात झाला. ज्यात पाच जणांनी आपले प्राण गमावले. एकाच कुटुंबातील चार जण आणि चालक असे एकूण पाच जण या अपघातात मृत्युमुखी पडले. तर अपघातात एक मुलगा जखमी झाला असून त्याला उपचारांसाठी रुग्णालयात दाखल करण्यात आला आहे.
