जळगाव (प्रतिनिधी) भरधाव डंपरने दुचाकीला धडक दिल्यामुळे चार वर्षीय चिमुकलीचा मृत्यू झाल्याची हृदयद्रावक घटना आज (गुरुवार) राष्ट्रीय महामार्गावारील हॉटेल तनय जवळ घडली. प्रेरणा योगेश नेमाडे (4, माऊली नगर, जळगाव), असे अपघातात मृत्यू झालेल्या चिमुकलीचे नाव आहे.
माऊली नगरात योगेश नेमाडे हे आपल्या परिवारासह वास्तव्यास आहेत. त्यांची चार वर्षाची मुलगी प्रेरणा ही जळगाव पब्लिक स्कूलमध्ये नर्सरी वर्गात शिक्षण घेते. गुरुवारी सकाळी प्रेरणाची शाळा सुटल्यानंतर तिची आई दक्षता या स्कूटी (एम.एच.12 ई.डब्ल्यू.8829) ने प्रेरणाला घेण्यासाठी गेल्यानंतर घराकडे परतत येत होत्या. त्याचवेळी राष्ट्रीय महामार्गावारील हॉटेल तनय जवळ भरधाव वेगाने येणार्‍या डंपर (एम.एच.19 सी.वाय.6769) ने जोरदार धडक दिली. यामुळे चिमुकली प्रेरणा गंभीर जखमी झाली.
तिला तातडीने जिल्हा शासकीय वैद्यकीय महाविद्यालयात दाखल केले असता वैद्यकीय अधिकारी डॉ. चंदन महाजन यांनी मयत घोषीत केले. दरम्यान, डंपर चालक डंपर सोडून पसार झाला. एमआयडीसी पोलीसांनी घटनास्थळी धाव घेत अपघातग्रस्त वाहने ताब्यात घेतली. यावेळी जिल्हा शासकीय वैद्यकीय महाविद्यालयात नातेवाईकांनी एकच आक्रोश केला होता.
