भुसावळ (प्रतिनिधी) गुजरात येथून खाजगी बसद्वारे भुसावळात आलेला तब्बल अडीच टन (२५०० किलो) केमिकल मिश्रीत बनावट खवा पोलीस उपअधीक्षक कृष्णात पिंगळे यांच्या नेतृत्वा खालील पथकाने शुक्रवारी जप्त केला आहे.
गणेशोत्सवासह आगामी सणांच्या पार्श्वभूमीवर मिठाई तसेच माव्याच्या मोदकांना मागणी वाढली आहे. या पार्श्वभूमीवर बनावट खवा मोठ्या प्रमाणात येणार असल्याची गुप्त माहिती पोलीस उपअधीक्षक पिंगळे यांना मिळाल्यानंतर त्यांनी आपल्या पथकाला सज्ज केले. गुजरातमधून आलेल्या एका ट्रॅव्हल्सच्या छतावर सुमारे अडीच टन (२५००) किलो खवा येताच पथकाने हा खवा जप्त केला. या प्रकरणी एका कुरीयर चालकासह एम. के. ट्रॅव्हल्सचा चालक व क्लीनर यांना ताब्यात घेण्यात आले आहे. या कारवाईने शहरात मोठी खळबळ उडाली आहे. दरम्यान, दूध न वापरता केमिकल्स आणि ऑइल पासून बनवण्यात येणारा हा खवा आरोग्यासाठी अत्यंत हानीकारक असतो. परंतू हा खवा नकली आहे की नाही? हे प्रयोग शाळेचा अहवाल आल्यानंतरच सांगता येईल.
