भुसावळ (प्रतिनिधी) शहरातील अष्टभुजा देवी मंदिरासमोरील रोडवर दोन मित्र उभे असताना दुचाकीवर आलेल्या अज्ञात दोघांनी शिवीगाळ करुन दोघांकडून ३० हजार ५०० रूपयांची रोकड आणि २ हजार रूपयांचा मोबाईल असा एकुण ३२ हजार ५०० रूपयांचा मुद्देमाल बळजबरी हिसकावून चोरून नेल्याची घटना २८ एप्रिल रोजी रात्री ८ वाजेच्या सुमारास घडली.
चोपडा तालुक्यातील अकुलखेडा येथील रहिवासी दीपक देविदास धनगर (वय ३३) हा तरूण आपल्या परिवारासह शहरात वास्तव्याला आहे. दीपक धनगर आणि त्याचा मित्र गणेश असे दोघे २८ एप्रिल रोजी रात्री ८ वाजेच्या सुमारास भुसावळातील अष्टभुजा देवीच्या मंदिराजवळ उभे होते. त्यावेळी दुचाकीवर आलेल्या अज्ञात दोन जणांनी त्यांच्याजवळ येवून शिवीगाळ करून दमदाटी केली. यातील दीपक धनगर याच्याजवळील २९ हजारांची रोकड आणि गणेश याच्याजवळील दीड हजार व मोबाईल असा एकुण ३२ हजार ५०० रूपये किंमतीचा ऐवज बळजबरी हिसकावून चोरुन नेला.
ही घटना घडल्यानंतर दुसऱ्या दिवशी अर्थात २९ एप्रिल रोजी रात्री १० वाजता भुसावळ बाजारपेठ पोलीस ठाण्यात धाव घेवून त्यांनी तक्रार दिली. या तक्रारीवरून अज्ञात दोन जणांविरोधात भुसावळ बाजारपेठ पोलीसात गुन्हा दाखल करण्यात आला आहे. पुढील तपास पोलीस उपनिरीक्षक मंगेश जाधव करत आहेत.
