जळगाव (प्रतिनिधी) शहरातून वेगवेगळ्या ठिकाणाहून दुचाकी चोरणाऱ्या दोन अट्टल चोरट्यांना शहर पोलीसांनी रंगेहात पकडले आहे. दोघांविरोधात शहर पोलीस ठाण्यात गुन्हा नोंदविण्यात आला असून त्यांच्याकडून आणखी इतर गुन्हे उघडकीस येण्याची शक्यता आहे. निळकंठ सुर्यकांत राऊत (वय-४० रा. प्लॉट एरीया, अडावद, ता. चोपडा) आणि ज्ञानेश्वर गुलाब पाटील (वय-२९, रा. वडगाव ता.चोपडा) अशी दोघं आरोपींची नावं आहेत.
शहर पोलिसांना मिळालेल्या गुप्त माहिती नुसार, शनिवारी रात्री ८ वाजेच्या सुमारास शहरातील चित्रा चौक, गोविंदा रिक्षा, कोर्ट चौक, गणेश कॉलनी परीसरात सापळा रचला होता. याच दरम्यान, शहरातील चित्रा चौकात दोन चोरटे मोटारसायकल चोरी करत असल्याचे पो.कॉ. तेजस मराठे, योगेश इंधाटे यांना गुप्त माहिती मिळाली. पोलीस आल्याचे बघताच दोघं चोरट्यांनी दुचाकीवरून पळ काढला. मात्र शहर पोलीसांनी पाठलाग करून त्यांना अटक केली. चौकशी दरम्यान, त्यांनी सात विना नंबरच्या मोटारसायकली पोलिसांना काढून दिल्या. दोन्ही संशयित आरोपीपैकी निळकंठ राऊत हा पुण्यातील रहिवाशी असून पुण्यातून दोन दुचाकी चोरी केल्या आहेत. राऊत याला पुणे व निगडी पोलीसांनी एक वर्षासाठी हद्दपार केले असल्याने तो जळगावात राहत आहे. हस्तगत केलेल्या २ लाख ४० हजार रूपये किंमतीच्या ७ दुचाकी ह्या जळगाव जिल्ह्यातील एमआयडीसी पोलीस ठाणे, धरणगाव, यावल परिसरातून चोरी केल्याची कबुली संशयित आरोपींनी दिली आहे. दोघांविरोधात गुन्हा दाखल करण्यात आला असून पुढील तपास पोलीस निरिक्षक अरूण निकम यांच्या मार्गदर्शनाखाली पो.ना.प्रफुल्ल धांडे आणि पो.कॉ. रतन गिते करीत आहे.
