जळगाव (प्रतिनिधी) आपल्या दुचाकीने कंपनीत कामावर जात असतांना ट्रकने दिलेल्या धडकेत एकाचा मृत्यू झाल्याची दुर्दैवी घटना आज सकाळी उमाळे फाट्यानजीक घडली. डिगंबर सोनू नेमाडे (वय-६५, रा. गजानन नगर) असे मयत व्यक्तीचे नाव आहे.
डिगंबर नेमाडे हे नेहमीप्रमाणे आज सकाळी ८ वाजेच्या सुमारास एमआयडीसीतील भाग्यश्री प्लास्टिक कंपनीत कामाला जात होते. चिंचोली-उमाळे गावादरम्यान राधाकृष्ण लॉनजवळ समोरून येणाऱ्या ट्रकने त्यांच्या दुचाकीला जोरदार धडक दिली. यात ते गंभीर जखमी झाले. त्यांना तातडीने शहरातील खासगी रूग्णालयात दाखल करण्यात आले. परंतू प्रकृती गंभीर असल्याने नेमाडे यांना गुलाबराव देवकर वैद्यकिय महाविद्यालयात रवाना करण्यात आले. त्याठिकाणी डॉ. सचिन अहिरे यांनी नेमाडे यांना मयत घोषीत केले. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली. दरम्यान, एमआयडीसी पोलीसांनी ट्रक ताब्यात घेतले असून चालकास अटक करण्यात आली आहे. प्राथमिक तपास सपोनि संदीप पाटील यांच्या मार्गदर्शनाखाली पो.कॉ. संतोष पवार, संदीप धनगर करीत आहे.
