कासोदा ता. एरंडोल (प्रतिनिधी) अंतुर्ली खुर्द शिवारातील आयटीआय कॉलेजजवळ दोन दुचाकींमध्ये समारोसमोर झालेल्या धडकेत दोन्ही दुचाकीस्वारांचा मृत्यू झाला. तर एक महिला गंभीर जखमी झाल्याची घटना घडली.
उत्राण येथील अमोल मांगीलाल भोई उर्फ गोलू (वय २२) हा मंगळवारी दुचाकी (एमएच – १९, डीई- ४०५८) ने कासोदा येथील बाजारात पेरु विक्रीसाठी गेला होता. बाजारात पेरु विक्री केल्यानंतर अमोल भोई हा दुचाकीने उत्राणकडे परत निघाला. याच वेळी निपाणे येथील रहिवासी वासुदेव गोरख पाटील हा दुचाकी (एमएच- १९, डिके ६०८७) ने निपाण्याकडून कासोदा गावाकडे जात होता. या दोन्ही दुचाकींची अंतुर्ली खुर्द शिवारातील आयटीआय कॉलेजजवळ समोरासमोर जबर धडक झाली.
या दुर्दैवी अपघातात दोघांचाही मृत्यू झाला. तर यातील एका दुचाकीवर बसलेली अंतुर्ली येथील महिला जखमी व बेशुद्ध अवस्थेत असल्याची माहिती सूत्रांनी दिली. ही महिला अंतुर्ली येथून बाजारात जाण्यासाठी दुचाकीवर बसल्याचे सांगण्यात आले. या तिघांना सरकारी गाडीने एरंडोलच्या शासकीय रुग्णालयात नेले असता डॉक्टरांनी तपासून अमोल भोई व वासुदेव पाटील यांना मृत घोषीत केले. तर जखमी महिलेवर एरंडोल येथे उपचार सुरु आहेत. याबाबत कासोदा पोलीस ठाण्यात रात्री उशिरापर्यंत या घटनेबाबत नोंद करण्याचे काम सुरू होते. या घटनेचा तपास सपोनी योगिता नारखेडे यांच्या मार्गदर्शनात सहाय्यक फौजदार रवींद्र पाटील हे करीत आहेत.
